UPP Unit Bumiputera Dudong udah nyikap diri napi PRN11 tu
SIBU: Parti Rakyat Bersatu (UPP) Unit Bumiputera Dudong udah nyikap diri nyaup parti nya ngulihka pemujur ba Pengawa Bepilih Nengeri ti Ke-11 (PRN11) tu ila.
Chairman sida, Bansa Sandah madah, diatu unit sida udah bisi lebih 2,000 iku raban lalu semina nganti maya PRN belabuh aja alai sida nyaup parti nya.
“Kami mega pechaya rayat ari lebih 200 buah rumah panjai di DUN Dudong ditu nyukung UPP pampang Dudong ti beperabungka Barisan Nasional (BN) ngambi pulai penuduk tu ari pegai penyakal.
“Enggau jaku muntang, pengundi Iban tauka Bumiputera ke bukai nadai penanggul nyungkung UPP bediri maya PRN tu,” pia ku iya maya berandau enggau pengarang berita, kemari.
Dulu agi ari tu iya nguluka Chairman UPP Dudong Datuk Tiong Thai King ngabas empat bengkah projek ari UPP Dudong ti bekenaka ungkus RM115,000 di Rumah Anthony Mering, Rumah Jabu Selat, Rumah Gagat Umar enggau Rumah Philip Radin.
Bansa madah, rayat ba DUN nya diatu mega udah ngelala bendar sapa Tiong laban ke suah niki rumah panjai sida.
Ku iya, Tiong sebedau tu endang dikelala lempung jari mantu rayat ba dia baikka ari pekara pengidup tauka projek enggau pemujur tikas pelajar nembiak.
“Nya alai, diatu kitai suah ninga rayat di rumah panjai muji Tiong ti suah mantu sida taja empai nyadi pengari rayat.
“Kitai pechaya undi rayat ditu enda ke bukai kelimpah ari BN (UPP),” ku iya madahka baru.