Dennis: Sekeda ketuai raban bansa Penan dipinta ngadar sebedau mantai penemu
MIRI: Kaban Kunsil Nengeri (ADUN) sitak Telang Usan Dennis Ngau nangkan sekeda ketuai raban bansa Penan ngambika ngadar sebedau mantai sebarang peminta ke tau ngenyimaka Tuai Pemegai Menua (TYT) kitai.
Berita ke bisi ayan madah, seraban ketuai nya ngansak Adelaide University mulaika penyampau duit AUD400,000 pemeri ke diterima entara taun 1987 ngagai 2006 ari Tun Pehin Sri Abdul Taib Mahmud, ex-Kepala Menteri Sarawak, diatu nyadi TYT.
Sida udah nganjung surat ngagai Vice-Chancellor Warren Bebbington minta duit nya dipulaika baru ngagai Sarawak laban sida nerima ngena chara belalai. Surat ke disain seraban ketuai ngena chelak jari, sida beguna amat ke duit nya dikena ngemansangka Penan Peace Park sereta nganjung bala anak sida besekula ba tikas pelajar ke tinggi agi.
“Endang patut sida belebas sereta bejimat mantai penemu kelebih agi enti bisi kaul enggau TYT. Keterubah, sida patut bisi bukti ke nyata. Enti sema nadai bukti baka ke disebut, sida tau dikumbai bechiping penemu,” ku iya lebuh dirandau ensana.
Pengawa nyain surat ngena chelak jari nya nyangka chelak jari orang bukai, sekalika pengawa nya digaga seraban orang tauka orang ngatika diri sengaja deka mantaika peminta nya.
“Taja sida nyenggala madahka peminta nya ungkup Penan Peace Park enggau bala anak sereta pelajar anak sida tang pekara tu bedau temu pengamat. Pekara dikenangi ke aku, iya nya duit tu tau pulai ngagai orang bukai tauka nyadi pekara bukai,” ku iya.