Atlet ngarika nengeri tu deka dipilih enda lama agi

KUCHING: Pengawa milih atlet ngarika kontinjen nengeri tu maya Sukan Malaysia Ke-18 (SUKMA XVIII) deka dipejalai udah bulan March tu ila, kandang empat bulan sebedau lumba nya berengkah ari 22 nyentuk 31 Julai.

Menteri Muda Lumba enggau Main Datuk Lee Kim Shin madah, pengawa latih intensif deka belabuh digaga nangkan nya, nyengkaum netapka penyampau midul emas ke patut dijapai dibanding enggau 72 midul emas ke kala dijangka sebedau tu.

“Kami diatu dalam renggat kedua ngaga pengawa latih ke digaga datai ngagai bulan March tu ila...Nangkan nya ila, kami deka milih atlet ngarika tim kitai lalu betatika pemerat ba pengawa latih intensif.

“Dalam timpuh ke sama mega, kami deka merambu ni naka penyampau midul emas ke patut dijapai kitai ngulihka gelar champian,” ku iya madah ba aum media pengudah Aum Begulai enggau Gerempung Lumba enggau Main Sarawak ditu, kemari.

Sama bisi enggau nguluka aum media nya keari, Ketuai Pegawai Eksekutif Serakup Lumba enggau Main Sarawak Dr. Ong Kong Swee sereta pegawai Opis Lumba enggau Main Menua Lukas Kalang Laeng.

Iya ngelalau tiap buah gerempung enda tau enda ngembuan komitmen ke besai ngelatih atlet sida iya kena beratika kontinjen nengeri ulih masuk semua macham lumba enggau main ke bisi dipekitka.

“Nyadi tim tuan rumah, kitai enda tau enda bisi fokus ke besai ngulihka mayuh agi menang midul sereta diberi gelar champian,” ku iya.