Besaup kitai meri daya pengidup baru ke sida
PEDAS Sri Aman ngarapka mensia mayuh, ejensi, NGO bukai besaup ngelempungka penusah sida ke tasah
KUCHING: Serakup Dayak Sarawak (PEDAS) diarika Pampang Sri Aman (PPSA) ngatur pejalai ngabas seraya nyuaka bantu ngagai peranak Rumah Masir, Rumah Ipan enggau Rumah Robert di Pruan B Sembau ke ditungung penusah angus kena 9 Januari tu tadi.
Ketuai Pampang PPSA, Insol Harry disempulang raban PEDAS ke bukai bekejang ari rumah iya di Batu Lintang, Sri Aman urung pukul 5 pagi ngelawa rumah panjai ke tasah nya.
Penatai sida sebuat dilaluka peranak Rumah Masir,
“
Ukai senang deka niri tauka ngentak rumah panjai baru laban ke udah angus tu, tang ari bantu sereta saup kitai mih nulung nyukung sida ke tasah tu
” ngepunka pengidup baru. Insol Harry Ketuai Pampang PPSA
Rumah Panjai Ipan enggau Rumah Robert.
Beduduk ari penusah angus nya, raban PEDAS selampur nengeri naka ulih besaup sereta bepupuka belanja dikena meli barang pemakai, berau, perengka sekula eng- gau gari ke udah kala dikena sereta bantu bukai.
“Raban PEDAS ngarapka bantu nya ulih nyaup ngelempungka tating penusah sekalika belanja ruang bilik tauka belanja ke bukai lebih agi sida ke bisi anak beseku- la,” ku Insol.
Pia mega ku Insol, iya ngarika raban PEDAS selampur nengeri ngarapka mayuh agi piak bukai baka gempung ukai dikuasa perintah (NGO), raban ari opis enggau ejensi perintah sereta raban orang ngatika diri bela besaup mantu raban sida ke tasah tu.
“Ukai senang deka niri tauka ngentak rumah panjai baru laban ke udah angus tu, tang ari bantu sereta saup kitai mih nulung nyukung sida ke tasah tu ngepunka pengidup baru,” ku Insol manta.
Dalam jaku pengelalu iya, Tuai Rumah Masir ngarika sida serumah mantaika pengaga ati sereta meri terima kasih ngagai raban PEDAS sereta ngagai semua orang ke udah mantu sida semenua ke dituntung penusah nya.
“Aku meri besai terima kasih ngagai raban PEDAS ke udah mantu kami ke tasah angus rumah. Taja bantu tu baka ke mit, tang iya ngemai reti ke besai ngagai kami,” ku Tuai Rumah Masir.
Berebak enggau nya, raban PPSA meransang sida ke tasah nya enda mudah mantul ati sereta kering semengat napi penusah ngenyit nya seraya ngarapka sida enda sanggu ati enti sema deka minta saup PEDAS udah tu.
“Anang sanggu ati minta saup kami enti sema bisi penusah tauka penanggul, ukai ga ngajihka rangkang ngachuk mata, tang kitai semua bela bejaga sereta ngadang diri nyema penusah ngenyit bisi nyadi,” ku tandu Insol.
Bekenangka penusah ke mungkur 75 iku orang sereta 12 buah ruang bilik di Rumah Panjai Pruan B ke udah angus rumah nya. Sida diatu benung ngenduh di rumah kaban belayan ke semak sereta bisi mega ke diau di dampa/ pelabuh ke bisi didirika besemak enggau tembawai angus.
Nitih ku penerang ari Tuai Rumah Masir, pun penusah nya nyadi agi dipansik piak bekuasa lalu naka diatu penyampau pengerugi sida ke tasah nya mega apin ditemu.
Sida ke tasah tu iya nya Rumah Ipan (lapan pintu), Rumah Masir ( tiga pintu) sereta Rumah Robert (sepintu) nyengkaum 21 iku nembiak sekula ari rumah ke tasah nya.