PKR udah sedia bebagi penuduk enggau kaban Pakatan Harapan
KUCHING: Parti Keadilan Rakyat (PKR) udah sedia ngatur pengawa bebagi penuduk enggau kaban dalam gempung Pakatan Harapan (PH) di Sarawak maya Pengawa Bepilih Besai Nengeri ti Ke-11 (PRN11) tu ila.
Chairman PKR Nengeri Baru Bian madah aum PH bejuraika kerusi dijangka deka diatur dalam bulan tu (Januari) tauka tengan bulan Februari.
“Pelaba aku dalam bulan tu (Januari) tauka pengabis laun, tengan bulan Februari. Laban jurai kami tau enda ibuh baum besai laban semina PKR betemu enggau DAP, lalu nangkan nya betemu enggau Amanah.
“Ngenang pasal penau deka bediri ba sesebengkah sitak, dia PKR deka berunding enggau raban DAP tauka Amanah,” ku Baru.
Iya madah munyi nya maya dikerandau pengudah bejadika pengawa makai tengahari ungkup raban orang buta di The Blind Centre di Jalai Ong Tiang Swee ditu, ensana.
Iya nandu, antara pekara ti deka dipejuraika enggau dua buah parti gempung PH (DAP enggau Amanah) semina bekait enggau sesebengkah sitak ke beserak pengari deka bediri.
“Pemerat kami semina enggai ke kerusi nya beserak, nya kebuah bisi pemerat berandau enggau DAP sereta Amanah. Enti sema udah diputus, baru kami madah baru,” ku iya.
Baru ti mega nyadi Kaban Kunsil Nengeri ( ADUN) Ba’kelalan madahka sigi bisi sekeda sitak PKR berepak enggau kaban PH, nya alai pekara tu patut diperunding begulai.
“Dipelaba Kunsil Nengeri (DUN) deka dipadam ujung bulan Februari, lalu PRN 11 disadang deka diatur kena 19 March,” ku iya.
Nyaut tanya pemberita, sentang DAP enggau PKR Sarawak baka ke nangi ke pangan diri, Baru madah:
“Enda entu betul enti ngena jaku nangika pangan diri, pelaba aku maya Pengawa Bepilih Besai ( Parlimen) ke-13 suba mega, kami bela bisi ati ke sekeda sitak ke sebaka.
Tang pekara ke berat ku Baru, bisi sempekat antara gempung PH endang patut nyatup BN (seiku ngelaban seiku).
“Pelaba aku enti pengawa nya mujur, nyangka enda ulih 100 peratus tang 90 peratus sigi ulih jalai, ku iya.
“Nya kebuah aku madahka nadai pilih tauka alternatif ke rayat Malaysia nyengkaum orang Sarawak, enda tau enda begempung ngelaban BN... nadai pilih,” ku iya.
Ba pengawa DAP ke ngaga pengawa makai lemai renggat menua ujung minggu tu tadi, ke semina ngangauka tuai pemesai Amanah aja, tang nadai mai PKR, ku Baru:
“Pekara nya tau ditanya kita (pemberita) ngagai DAP... Aku pan enda nemu kebuah, tanya sida (DAP) empu.
“Enda ku ngumbai nya nangi, nya barang ku sida iya, pemutus sereta polisi sida. Enti kami (PKR) enda dibai ngagai pengawa makai lemai nya, ukai nyadika penanggul.
“Tang ke batang, kami enda tau enda berakup. Pengawa makai lemai bansa nya pekara ke mit, tang pekara ke berat diatu deka nyatup BN,” ku iya.