PKR Stampin mujur begulai merarau enggau raban orang kurang benasit
KUCHING: Sebaka enggau jaku maya Hari Krismas, Tuhan meri, ‘God so loved the world that HE gave Jesus on Christmas’ mandangka pengasih Allah Taala, ke ibuh ke dunya tu, nya jaku Hari Krismas, ku Chairman Parti Keadilan Rakyat (PKR) Baru Bian.
“Tu sebengkah atur pengawa ke berat, ukai semina jaku pesan ke sebaka enggau jaku Hari Krismas. Ke orang kristin, enti kitai beratika Bup Kudus, siti ayat dalam Bup John 3:16 ke madahka ‘For God so loved the world that HE gave HIS only Son, that whosoever believe in HIM shall not perish but have eternal life’.
“Baka nya mega enggau atur pengawa makai tengahari ke udah diatur kita (PKR Stampin ungkup Blind Centre) sama pemeret sereta setipak enggau jaku Hari Krismas,” ku Baru madah lebuh ngepunka pengawa Makai Tengahari begulai enggau orang buta ba Blind Centre di Jalai Ong Tiang Swee ditu, ensana.
Atur pengawa ke sebaka nya udah diatur masuk ke-6 taun begulai enggau PKR, sereta kemari digulu urung 200 iku orang buta sereta sekeda sida bukai ke timpang pendiau.
Baru ti mega nyadi Kaban Kunsil Nengeri (ADUN) Ba’kelalan madah, setipak enggau jaku Hari Krismas mega, baka Tuhan ke udah merekat kitai, baka nya mega kitai meri pulai ngagai orang bukai.
“Tuju kitai dalam komuniti, pengawa kitai mega setipak enggau jaku Hari Krismas, laban kitai ngelatih sida ke timpang pendiau ngambika sida iya nyadi orang ke bepengelandik dalam komuniti sereta nyadi orang ke ulih ngatika diri.
“Berebak enggau pemar ekonomi ke ditapi kitai , ukai semina politik ke majak enda manah, pengawa ke digaga kitai sehari tu berat. Kitai ke deka mantu komuniti mega ngasaika pemerat.
“Ketegal nya, dalam gaya ekonomi ke mar ditapi menua kitai, pelaba aku mayuh orang bukai ngelingi kitai sama betapi enggau penusah dalam pendiau sida iya.
“Aku macha sekeda berita ke bisi madahka gaya ekonomi ke enda meruan manah bansa tu, mayuh orang diketuka kereja, kena buai kereja, ketegal kompeni nadai penguntung. Sida pan berunding bakani ku nasit sida udah tu ila, bakani deka ngiga pengawa baru, bakani deka mantu ruang bilik diri empu...Nya gaya pemar ke ditapi kitai diatu,” ku iya.
“Pelaba aku, Tuhan deka merekat pengawa kita ke seruran mantu orang. Aku untung seharitu ulih begulai enggau kita,” ku iya.
Sama bisi nguluka atur pengawa nya, chairman pampang Kuching, Sarawak Soceity for the Blind Ying Ten Ping, enggau ADUN Batu Lintang See Chee How ti mega nyadi chairman PKR pampang Stampin.
Sebedau nya, Ying madah, sebengkah ari pemerat tuju gerempung nya, iya nye nyendiaka pengawa latih vokasyenal sereta pengawa rama, ngambika sida ke buta nya ulih disedia enggau pengelandik, ngambika sida nemu ngulihka pemisi diri sereta nemu ngatika diri dalam timpuh ke panjai.
“Antara program ke bisi disediaka ba palan tu, iya nya dibagi ngagai tiga macham, pengawa latih rama, latih vokasyenal, sereta ngiga pengawa ke sida kelimpah ari semina diau di rumah aja.
“Kami seruran ngiga pemujur ke manah lalu nambah ke nya, agi mayuh servis sereta perengka guna di palan tu ti ulih digaga manah agi. Rumah seringkat ti digaga dalam taun 1963 kelia mayuh udah rusak, tang kami belubah ngemanahka rumah tu, sereta nganti perengka guna ke lama enggau ke baru ngambika ulih alai raban orang buta tu ngaga pengawa latih sida,” ku iya.