Pengawa miring enda patut dikereja bansa bukai, ku Collin

KUCHING: Presiden Tetinggi Serakup Dayak Sarawak (PEDAS), Major (B) Collin Imran enda lantang ati pengudah macha surat berita ke bisi ayan mantaika Presiden Parti Demokratik Progresif Sarawak (SPDP) Datuk Seri Tiong King Sing dipebasa nyereta pengawa miring sereta miau piring di laman rumah panjai Blok C, Sungai Entulang, Bakong nyerumba Program Ketuai Begulai Enggau Rayat diatur SPDP di Marudi apin lama ke udah.

“Pengawa miring tu adat asal bansa Iban lalu pengawa tu sigi enda tau dikereja sebarang orang, kelebih agi bansa bukai,” ku Collin manta.

Ku Collin, piring kelai basa kitai bansa Iban ngagai Petara, Orang Panggau enggau Bunsu Antu sereta mega Petara Aki Ini kitai kelia datai ngesah sereta ngiring pengawa dikereja kitai, sekalika nya pengawa kediri empu tauka sekayu menua ngambika bulih penchelap, pengeraja, pengerai tubuh, pengelantang, pengelikun sereta pemujur dalam pengidup sereta dikena orang betabarka burung ke jai.

Pia mega ku iya, piring dikena ngelaluka penatai pengabang mayuh ngichaka sida nya ngemai tuah, ngemai limpah ngagai orang ke ngempu rumah sereta ngagai sera tubuh bala pengabang empu, minta sida sama betuah belimpah baka orang ke ngempu rumah.

Lalu baka nya mega biau dikena minta kasih ari Petara ngambika meri penchelap enggau pengembap, meri pengerai enggau pengayu ngagai semua bala mensia mayuh nyengkaum bala pengabang sereta orang ke ngempu rumah nya empu.

“Kitai semua bela nemu piring tu digaga kitai nitihka tuju pengawa nya dikereja. Ambi ke chunto, kitai miring maya ngampun lebuh menua sigau tauka angat lalu piring tu dikena ngibun menua ngambika likun sereta mandung pengidup rayat iya.”

Ku Collin nampung, piring tu bisi empat renggat nitihka pemerat tuju pengawa dikereja. Tetiap renggat nya ngemai reti sereta pemesai bungkur pengawa nya sereta bansa piring dikena mega nitihka adat asal ba sekeda menua.

Nya alai, piring tu sigi enda tau sengapa orang megai iya, kelimpah ari peturun asal bansa Iban nya empu iya ke agi ngemeranka pengarap lama ba ruang bilik sida. Ulah sekeda ketuai komuniti ti ngemendarka raban bansa bukai bela enggau megai piring nya balat ngasuh ati bansa Iban tekesima.

Ku iya, nadai salah kitai bebasaka penatai raban ketuai tauka pengari rayat ke datai ngusung rumah panjai tauka tumpuk pendiau kitai, tang adat asal kitai baka adat miring tu meseti dikemeran ngena chara ke betul laban nya tau amat ngasuh charut sereta tekesima.

“Bekenangka pengawa Datuk Tiong nya, nama kebuah iya ke nyadi pengabang tau diasuh orang ke ngempu pengawa nya bebiau? Tambah mega iya tu bansa bukai.”

“Kitai tau masa raban pemesai tauka pengari rayat ngena chara ke bukai, kelimpah ari ngasuh iya nyereta pengawa miring, kelebih agi pemesai ari bansa bukai. Kitai patut lebih agi bebasaka adat asal kitai empu ngelui ari pekara ke bukai. Kemeranka adat asal tu ngambika kitai seruran chelap lindap nguan menua,” ku Collin manta baru.

Orang ke ngempu pengawa tu meseti bebasaka adat bansa Iban lalu enti sema orang ke ngempu pengawa tu enda bebasaka adat asal diri empu, baka ni kitai bansa Iban deka ngasuh bansa bukai bebasaka adat asal kitai.

“Sida ke ngempu pengawa tu jangka aku lebih nemu penti pemali adat bebiau, laban adat bebiau enda tau dikereja orang sengapa.”

Berebak enggau nya, Collin ngarika raban PEDAS selampur nengeri nyengkaum raban bansa Dayak kelebih agi bansa Iban ti agi ngemeranka pengarap lama enggau adat asal baka pengawa miring tu ngarap pekara ke bansa tu badu agi nyadi sereta piak ke ngempu tanggungpengawa mega lebih sensitif enggau pekara ngaul adat asal tu.

Pia mega, mayuh orang komplin minta raban PEDAS ngutuk pengawa megai piring sereta bebiau ti dikereja Datuk Tiong sereta ngutuk ulah sida di Rumah Sungai Entulang Bakong ti enda bebasaka adat asal Iban nya.

“Kemeran sereta bejalaika adat asal ngena chara ke engkeman lalu enda melakangka sensitiviti bansa asal ke ngempu adat enggau pengarap nya,” ku Collin nyimpul.

Bekunsika penemu ke sebaka, Ketuai Pampang (KP) PEDAS Pampang Kuching (PPK), Victor madahka sigi nadai patut bansa bukai kelimpah ari bansa Iban empu tau megai piring sereta bebiau laban kitai balat ngemeranka sereta bebasaka adat asal nya.

“Pengawa miring tu ukai pengawa sengapa ke tau dimain, pengawa tu ngemai reti ke besai dalam pengidup kitai bansa Iban kelebih agi sida ke agi bepegai teguh dalam pengarap lama.

Tambah mega ku Victor, pengawa ke bansa tu balat enda bebasaka adat asal kitai Iban sereta ngasuh ati kitai tekesima laban pengawa sida ke ngasuh bansa bukai megai piring nya enda nyenyalah baka ngemelika adat asal kitai Iban.

Victor mega madahka adat asal enggau pekara politik tu sigi enda tau diasuh sebilik laban kededua iya sigi jauh bida. Adat asal tu atur enggau teladan pengidup, penti pemali sereta pengarap kitai, tang politik tu nadai sebarang kaul enggau adat istiadat kitai Iban.

“Anang ketegal kelalu deka ngangkatka sukung ngagai pemesai tauka pengari rayat ngujungka adat asal kitai Iban diteju ke tisi,” ku Victor manta.