Kimpin sain jari S4S mujur teulihka 300,000 iti
KUCHING: Kimpin sain jari ‘Sarawak For Sarawakians’ (S4S) udah teulihka pemujur pengudah raban nya minta kuasa autonomi Sarawak pulai baru baka ke udah disemaya dalam Sempekat Malaysia 1963 (MA63) nyapai juluk 10 peratus sain jari ari 2.6 juta peranak Sarawak kena 31 Disember 2015 tu tadi.
Pengari S4S ke mantaika penerang nya, Peter John Jaban madah, sida bisi 300,000 sain jari dalam 300 iti bup sain datai ba timpuh diletak iya ke dikena raban volunteer S4S ngumpul sain jari nya ari peranak Sarawak.
“Bup tu deka dianjung ngagai Kepala Menteri Datuk Patinggi Tan Sri Adenan Satem sebedau pengawa bepilih tu ila,” ku iya madah rambau sidang pengarang iya ke diatur ba sebengkah hotel ditu empai lama ke udah.
Tu penerang ke terang endar ngagai kededua Perintah Besai enggau Perintah Nengeri alai raban politikan bela ngiga mandat ari rayat rambau pengawa bepilih deka dipejalaika beberapa bulan da agi, ku iya nambah.
John seklai agi manta keutamaan raban S4S nya terang amat sentang peranak Sarawak ngetanka hak sida ke udah lama lenyau lalu pekara nya enda teputar enti sema semaya pengengkah enggau kuasa otonomi sida di baruh Sempekat Malaysia dipulaika baru.
Ku iya, S4S minta semua raban politik di nengeri tu ngesahka polisi sida laban perintah ke megai kuasa diatu udah ngepunka pengawa ari renggat nembiak redak parti ba Article VIII dalam Sempekat Malaysia.
Ku John nambah, akta di dalam pekara politik nya meri mayuh peransang ngagai Peranak Sarawak ngambika bela nyain surat nya pengujung bulan tu tadi kelebih agi Melayu sereta peranak menua pesisir ke sebedau tu berasai nangi deka nyain nya tang pengudah nya ngubah runding sida nyain sereta nulis empu nama diri.
Ku iya nambah, peranak Sarawak deka nemu pelin pejalai pekara politik ke bendar iya kandang jam ke diatu sereta deka nemu penerang ke silik chara Sarawak tu bepilih sereta pelin bejalaika pengawa ungkup lima taun ti deka datai sebedau pengawa bepilih dipejalai.
Pia mega ku John, Kepala Menteri udah bejaku mayuh sentang kuasa autonomi sereta royalti minyak enggau gis ngagai piak Perintah Besai.
“Tu pun pengawa ke manah amat tang diatu iya patut mantaika pelin diperambu iya nya nyapai pemujur. Iya (Adenan) patut berunding enggau Perintah Besai lalu ngayanka sekeda ari pengamat jaku diri ba mua peranak Sarawak,” ku iya.
Bekenangka pengawa raban S4S, iya meri besai terima kasih ngagai raban volunteer S4S laban ke udah bebendar bejalaika pengawa ngambi sain di serata nengeri tu seraya madahka diri sekalika bediri tauka enda rambau pengawa bepilih tu ila.
“Aku bebendar nyukung pengawa dipejalaika raban S4S lalu dikena nentuka juluk ulih dijapai sereta kitai mujur teulihka kuasa autonomi enggau ‘sovereignty’,” ku iya.
Kelimpah ari nya, iya sekali agi madah, S4S tu ‘Peoples Movement’ sereta deka nyadi pelasar nyadaka hak peranak Sarawak lalu ukai pelasar dikena sebarang orang bejalaika agenda politik.
Sama bisi datai rambau sidang pengarang nya, Penyukung S4S Robert Liew sereta KC Tan.