Pengawa ASADIA ngangkat ngenanka main asal bansa Dayak patut dipuji: Mundaw
KUCHING: Pengawa raban Akademi SADIA (ASADIA) ngemeran sereta ngangkatka main asal bansa Iban majak ngerembai lebih agi ba raban bansa Dayak Iban patut dipuji.
Pengawa tu mega nerima sukung ari Renjimen Renjer DiRaja (RRD) ke bepangkalan di Kem Muara Tuang ditu alai sida udah ngadaka kelas belajar gendang pampat Iban.
Nengah pelasar ASADIA nyadi pengatur, kelas tu udah disereta urung iya 10 iku raban RRD bansa Dayak ari kem nya.
Nitih ku Panglima Divisyen Pertama Infantri Malaysia, Mejar Jeneral Datuk Stephen Mundaw, pengawa bala nembiak redak dipegai iya nyereta kelas belajar gendang pampat tu chukup manah.
“Nyadi raban soldadu ari raban bansa Dayak kitai sigi patut ngetanka adat asal bansa kitai Iban empu lebih agi baka gendang pampat tu.
“Ba raban bansa Dayak Iban, gendang pampat tu ke bendar iya ulih meransang pemerani dalam diri kitai empu sereta kitai deka meda semangat tu dipasuk dalam tubuh genap iku kitai,” ku iya.
Kelimpah ari belajar gendang pampat, Stephen mega meri peransang ngagai raban iya belajarka Ajat Ngayau iya ke nyadi kelai renjer bansa Dayak.
Ketuai ASADIA, Mabong Unggang berasai gaga amat ati pengudah 10 iku raban RRD belajarka main asal Iban baka gendang pampat nya.
Berebak enggau nya, Mabong ngarapka pengelandik ke dipejalar sida ari kelas nya ulih dikerembaika agi ngagai raban ke bukai pengudah sida pinchin gawa iya.
Mabong mega meri besai terima kasih ngagai raban ke udah nyaup iya ngemujurka kelas gendang pampat nya baka Ir Tangai ke udah mantu iya nyediaka perengka.
Bela bisi nyaup ngemujurka kelas nya iya nya Ikum Usat, Betuah Belimpah enggau Anthony Tutong nyaup ari pekara belanja, John Nuga ke nyadi pengajar sereta Kapten Joraimi nyadi koordinator.