Kem ke diatur Eco Lodge, Hope Place enggau SKUP nyaup nempa penyedar ba nembiak mit
KUCHING: Seraban 60 iku raban nembiak mit bejalai seraya ngusung ruang bilik ba sekeda endur maya kem kemisi sekula ke diatur Eco Lodge, Hope Place enggau Society for Kuching Urban Poor (SKUP) kena 3 Disember tu tadi.
Nadai ngira gaya hari, raban nembiak ke beumur entara 7 ngagai 12 taun nya nganjung barang pemakai ngagai ruang bilik di Stapok, Jalai Keretapi, Kuching. Sida nembiak mit tu diuluka apai indai enggau pengajar ngelawa endur nya.
Nengah kem tu, raban nembiak mit tu ulih ngasaika peneleba bejalaika pengawa pengasih ngagai raban orang ke begunaka bantu nya.
“Kem kami tu berambaika leka jaku ‘Roots of Mercy, Wings of Hope’. Nya alai, tuju pengawa kami endang nyaup bala nembiak mit bejalaika pengawa pengasih ungkup orang bukai ke kurang benasit.
“Kitai enda ibuh ngiga jauh laban ruang bilik ke seranta nya bisi ba kandang mengeri besemak enggau kitai. Chara kami tu nyaup raban nembiak meretika pekara ke patut dibantu sida, sekalika nengah jalai ke sebaka tauka chara bukai,” ku Prinsipal Eco Lodge, Eileen Chua.
“Kitai berengkah ari pengawa pengasih ngulihka belanja ungkup Hope Place sereta mega SKUP, lalu nerima timbal ke chukup manah ari raban apai indai.
Berebak enggau nya, kami mega deka ngasuh raban nembiak mit tu nemu kati chara nulung orang kelimpah ari pemeri mata duit aja. Tu bekual rat enggau jam sereta tulang sida ngereja pengawa.
Kelimpah ari nya, kitai mega meransang sida ngembuan kaul rat enggau ruang bilik ke udah ditulung sida,” tambah Chua.
Barang sapa ti deka nemu penerang silik pasal aktiviti Eco Lodge jemah ila, tau betelefon nuju Chua ba lumur 012-8089118.