Ali ngelempaika pemutus ba ketuai renggat tinggi BN

KUCHING: Penyandang penuduk sitak Kunsil Nengeri (DUN) Muara Tuang Dato Sri Mohamad Ali Mahmud ngelempai pemutus ngagai ketuai renggat tinggi Barisan Nasional (BN) sekalika iya agi dikearap ngenanka penuduk nya tauka mindah ke bukai.

Cherita ke selebubu didinga mansa pending ke madah, chalun ari Parti Pesaka Bumiputera Bersatu (PBB) deka bediri ba sitak DUN baru Stakan maya Pengawa Bepilih Nengeri ti Ke11 (PRN11) tu ila.

Nyaut Tanya pemberita ram- bau ngulu Pengerami Ketuai Begulai enggau Rayat ke diatur di Balai Besai Kampung Merdang Gayam kemari, iya madahka diri nadai penanggul nangkup pengawa nya.

“Tang iya ke amat aku rindu ke rayat ba kededua sitak nya, baik nya di Muara Tuang tauka Stakan,” ku iya.

Ngasuh spekulasyen nya majak terang, Ali nyadang PBB deka nyabung chalun baru ba sitak Muara Tuang.

“Aku ngarap BN deka nyabung chalun ari PBB ba sitak Muara Tuang maya PRN tu ila ’ ku iya

Lebuh nerang enggau silik Ali madah, majoriti bansa ke nguan sitak Stakan endang bansa Iban lalu ditangkanka bansa Bidayuh.

Ku iya, sekeda nya bansa Melayu enggau China lalu aku nadai penanggul ngulai rayat di sitak baru tu.

Entara sekeda kandang endur ke kena bungkur DUN Stakan iya nya Pelaie, Melaban, Merdang Gayam, Merdang Lumut, Merdang Limau, Sg Empit, Pengkalan Kuap, Kpg Sri Arjuna, Kpg Sidanu enggau ke bukai