Sekula di DUN Ngemah patut ngetanka pemanah rikod prestasyen nembiak
KANOWIT: Sekula di sitak Kunsil Nengeri (DUN) Ngemah udah mujur ngerikod kusung peratus bekaul enggau penanggul rama ba raban nembiak iya.
Kaban Kunsil Nengeri (ADUN) Ngemah Alexander Vincent madah, taun nyin kemari sekula di sitak tu beresi ari sebarang penanggul rama.
“Aku deka sekula di sitak tu ngetanka penyulut tu dikena nyaga pemanah nama kita di Ngemah tu.
“Aku mega dipadahka sekula di sitak Ngemah tu ngerikodka prestasyen ke manah ba kurikulum enggau akademik iya,” pia ku iya maya bejaku nyuaka penyampau 200 buah beg rambau Pengerami Nyuaka Beg Sekula Nembiak Primari 1 (SK/SJK) enggau Pom 1 (SMK) Sitak DUN Ngemah di SMK Sedaya semak ditu, lemai kemari.
Sama bisi datai iya nya Penulung Pemesai Pelajar Pelilih Kanowit Berita Sabang, Prinsipal SMK Sedaya Langgie Ujang, Chairman Kaunsil Kepala Pengajar Pelilih Kanowit Jabut Minda, Chairman Gerempung Apai Indai enggau Pengajar (PIBG) SMK Sedaya Andin Nuing sereta raban ketuai komuniti ke bukai.
Pengawa nyuaka beg sekula nya udah disuaka Alexander ngagai raban Kepala Pengajar sereta raban Chairman PIBG sekula di sitak nya ngarika piak sekula sida.
Alexander mega ngansak ngambika raban nembiak sekula nguasa pengawa bekenaka Internet tauka teknologi pemadah (IT) dikena ngemuntangka pekara pelajar sida.
“Pengelandik bekenaka IT tu beguna amat lalu aku meri peransang ngagai raban apai indai ngambika ngiring bala anak bekenaka IT.
“Pekara tu deka ngemu- ntangka pengawa matau raban nembiak bekenaka IT ngambika sida enda salah guna. Iya mega tau ngerusak ulah nembiak nya empu lalu tau mega ngemai pemaik enti sema betul chara nguna iya” ku iya.
Ku iya, raban apai indai enggau nembiak nya empu patut nerima IT dalam pelajar sida.
“Taja pia, kitai seruran bejejimat bekenaka IT ngambika iya enda meri pangka ke enda manah ngagai kitai empu. Mayuh penanggul rama bisi dirikod sereta diripotka nyadi bepun ari pengawa bekenaka IT tu,” ku iya nambah baru.
Berebak enggau nya, sekali agi iya madah sepemanjai nyadi pengari rayat di sitak DUN Ngemah, iya seruran ngemeratka pekara pelajar.
Pekara tu ku iya nyengkaum pengawa ngagihka belanja enggau bantu belanja ngagai sekula.
“Aku mega deka terus bebendar bejalaika pengawa mantu sekula di sitak tu.
“Kelimpah ari nya, anang irau laban mayuh agih belanja sereta bantu deka disediaka perintah besai dikena mantu sekula di menua tu,” ku tandu iya.