Mensia mayuh ke suah ngulu program SPDP di Bakong ukai orang ari luar
LAPOK: Parti Demokratik Progresif Sarawak (SPDP) bebulaka jaku tuduh sekeda orang ke ngumbai parti nya mai raban orang ari luar dikena ngerichahka pengerami ke diatur ba rumah panjai di menua Bakong.
Chalun SPDP ungkup Konstituensi N76 Marudi, Datu Dr Penguang Manggil madah, parti enda kala mai raban orang ari luar ketegal deka mandangka diri mayuh penyukung baka ke dituduh laban majoriti sida endang peranak menua tu empu.
“Nyema bisi orang luar, nyangka seiku dua nya pan datai kediri, ukai dibai ngena bas.
“Nya alai, penemu ke ngumbai orang luar tauka ukai pengundi di sitak Marudi tau enda ibuh disebut.
“Ninting kali bisi pengerami baka program begulai enggau rayat, kami endang nganggauka semua orang datai.
“Ambika chunto sehari tu (ensana) kami bisi nyediaka pemakai ungkup 600 iku temuai, tang penyampau orang ke datai ngelui ari ke dijangka,” ku iya.
Dr Penguang madah munyi nya pengudah Program Gempuru Indu Marudi di Rumah Musin Radin, Sebatang Lapok urung 63 kilometer ari Miri.
Nangkan nya, iya meri terima kasih ngagai peranak rumah panjai ke seruran sampal datai meri sukung ngagai program ke digulu iya ngelama tu.
Lebih 500 iku peranak ari kandang menua Lapok bisi ngulu program nya.
Seraya meri terima kasih ngagai peranak di kandang menua Bakong, Penguang minta bala kaban parti terus besaup ngenegapka parti nya.
Dulu ari nya, Penguang nyuaka geran RM65,000 ungkup projek pemansang di di Rumah Musin.
Bela diatur iya nya demonstrasyen ngaga keropok enggau pengawa beperesa pengerai.
Ba program nya mega, iya bisi nerima pom peminta nyadi kaban ari 101 iku exkaban Parti Keadilan Rakyat (PKR) ke disuaka Awong Banyang.
Sama bisi datai Ketuai Nembiak SPDP Kaunselor Robert Ayu, Ketuai Indu Marudi Theresa Gelang enggau Ketuai Pemadah Nembiak SPDP Jaya Ramba.