Semina PBB aja keran menggi sitak Serembu
KUCHING: Kelimpah ari Parti Pesaka Bumiputera Bersatu (PBB) nadai didinga parti gempung Barisan Nasional (BN) bukai di nengeri tu ditemu keran ngining penuduk baru Kunsil Nengeri (DUN) Serembu.
Naka tu kaban PBB di Serembu endang dipeda keran ngambu penuduk nya awakka ulih dipenggi parti sida.
Taja pia, dulu agi ari tu Parti Bersatu Rakyat (UPP) bisi madah diri ngining penuduk Serembu, berindik ari penuduk diambi ari Mambong (dulu suba dikumbai Bengoh) alai Sapit Presiden UPP, Datuk Dr Jerip Susil nyadi penyandang .
PBB endang bisi ati deka menggi Serembu kelimpah ari Bukit Semuja (dikelai ari kededua Tebedu enggau Kedup, lalu kededua iya di baruh PBB) laban urung 90 peratus pengundi ba sitak nya endang raban bansa Bidayuh.
Penyukung PBB mega madahka komiti pengawa bepilih sida udah berengkah bejalaika pengawa ngagai Serembu.
“Di baruh pegai Kaban Parlimen (MP) Puncak Borneo (dulu suba dikumbai Mambong) Datuk Seri Dr James Dawos Mamit, Opis PBB udah ditumbuh lalu udah disikap enggau semua perengka guna dikena bejalaika aktiviti ba sitak bepilih ke baru nya.
“Ketebal agi raban komuniti Bidayuh ke diau mendam di menua nya chukup pechaya ngagai PBB laban parti nya chukup tegap sereta seruran begempung enti dibanding enggau sekeda parti ke bukai ti suah betalat enggau pangan diri.
“Tambah mega, PBB tu dibaruh iring Kepala Menteri Datuk Patinggi Tan Sri Adenan Satem.
“Enti sema Serembu di baruh PBB, kami deka jampat agi mansang sereta deka lebih agi dikemeratka,” pia ku seiku ketuai PBB iya ke enggai nama iya disebut.
Serembu tu diuan dua bengkah raban Bidayuh – Broih enggau Krakong.
Iya beratika raban UPP bisi ngatur pejalai ngagai Serembu tang pengawa sida nya nadai temu tuju lalu sida semina ngemeratka pengawa mantu Datuk Dr Jerip ngerapitka pemanah kaul UPP di Mambong.
“Enti PBB minta diri menggi Serembu, ba runding aku, UPP sida enda mantah tauka ningkahpemutus nya laban sida naka ulih ngetanka diri,” pia ku seiku ari raban PBB.
Kelimpah ari UPP, naka ke diatu nadai sebarang parti gempung Barisan Nasional (BN) tauka Parti BN-Plus bisi nyengala ngining Serembu laban berita ngerimbas pending madahka PBB bisi ati ngagai penuduk nya.
Iya andal amat enti sema PBB minta diri menggi penuduk nya, parti ke bisi ati sereta ke udah berengkah bejalaika pengawa sida deka meri awak ngagai PBB laban sida nitihka genteran jaku ‘tejuka pemutus chalun ti deka bediri ngagai kepala menteri’.
Sekeda ari chalun ditaga ulih menang udah berengkah bejalaika pengawa nyengkaum seiku ex-pemesai kanan polis, luyar sereta mega sekretari pribet. Taja pia, sida tu ukai peranak asal menua nya lalu sida tu ukai chalun ke engkeman bediri rambau pengawa bepilih tu ila.
Raban Parti Keadilan Rakyat (PKR) bansa BidayuhChina mega bisi bebendar bejalaika pengawa ngagai rayat. Taja pia, iya kelalu diperatika kelalu biak nangkup pengawa nya.
“Raban Broih enggau Krokong tu ngembuan main asal ti nyelai lalu deka ngembuan seiku ketuai ke tuai runding sereta ngembuan peneleba nyatup pekara raban komuniti sida enggau politik. Chalun PKR nya nyangka ngembuan pelajar tang apin chukup manah ungkup pengundi di Broih enggau Krokong ditu,” ku ketuai PBB nya.