Semawi entara chalun PKR ke disadang bediri di Machan
SIBU: Penuduk Kunsil Nengeri (DUN) Machan serak Pengawa Bepilih Nengeri (PRN) ti deka datai nyangka deka mandangka seiku pengari bansa Iban ti endang peranak menua nya empu bediri ba penuduk nya ngena tikit Parti Keadilan Rakyat (PKR).
Sebedau tu, PKR kala mantaika chalun sida iya nya George Chen ngarika parti nya nyatup chalun Barisan Nasional (BN).
Tang diatu, Semawi Paong maya ke berandau enggau pengarang berita madah, nyema bisi sukung ke chukup nadai salah alai iya bediri ngarika bansa Iban empu bediri ba penuduk nya.
Ku iya, George ti kala bediri dia suba diatu deka bediri baru ketegal peranak menua nya empu nadai kala ngayanka diri deka nyilih George nyengkaum serak PRN tu.
“Munyi ke udah dipadah PKR empai lama tu tadi, chalun ba DUN Machan iya nya seiku ari ex-chalun ke udah kala bediri dia suba.
“Tang taja pan pia, pekara tu ulih berubah baru maya parti ngemansutka pemutus ke penudi rintai nama chalun enda lama agi,” pia ku iya ma- dah, kemari.
Semawi madah, iya bekenaka sukung ke tegut ari bala rebak baru lebih agi peranak menua nya empu sebedau mutus deka nyadi chalun PKR.
Ku iya, naka ke diatu, iya nerima sukung sereta peransang ke manah ari sida semenua (Machan) ngasuh iya nyadi chalun nyilih George.
“Nadai kala ba ati aku deka dipilih nyadi chalun ba nama-nama parti politik ngelama tu.
“Tang diatu aku berunding, enti ukai kitai, sapa agi?. Enti ukai diatu, ke- maya agi?,” ku iya madah baru.
Berebak enggau tu, Semawi madahka diri udah chukup besedia nyadi chalun PKR ba PRN tu bepun ari sukung bala bukai ti ngansak iya bediri.
“Ngarapka sukung kita ulih nambahka mayuh agi undi ngagai Pakatan Harapan.
“Pia mega aku ngarapka kitai DUN Machan tu ulih bechuntoka menua bukai baka Krian enggau Ba’kelalan enti kitai deka meda ubah pemansang,” pia ku iya madah.
Ba pekara ti bekaul, bisi dedinga berita ari penerang ke besemak enggau PKR madahka komiti besai parti nya deka nganti George Chen, bebansa China enggau bansa Iban empu ngarika parti sida bediri ba DUN Machan.
Semawi, 38, ke gawa ba Sarawak Shell dipadahka seiku chalun ke engkeman nyilih George.
Maya PRN 2011 suba, George ti bulih 2,054 iti undi alah ngelaban Datuk Gramong Juna (BN-PBB) enggau 3,683 iti undi.
Chalun ke bukai bela bisi bediri maya tu iya nya Augustine Liom (SNAP) bulih 338 iti undi enggau Kong Tat Kim ( PCM) bulih 696 iti undi.