Nyabong, Jamit dipedara minta berekat napi PRN ti deka datai
KAPIT: Pengawa bedara minta berekat, sebengkah adat asal bansa Dayak Iban udah diatur ba Palan Servis Parti Rakyat Sarawak (PRS) Pelagus ditu ungkup Nyabong Ijang enggau Jefferson Jamit Unyat empai lama ke udah.
Nyabong ari PRS lalu Jamit ari Parti Pesaka Bumiputera Bersatu (PBB).
Nyabong dichiri nyadi Sekretari Politik Kepala Menteri Sarawak nyilih penuduk penyandang, Wilson Ugak Kumbong ke diatu mangku pengawa nyadi Kaban Parlimen (MP) Ulu Rajang kenyau ari taun 2011 suba.
Jamit dipaduka mangku pengawa nyadi Sekretari Politik Kepala Menteri kenyau ari bulan Disember 2013 pengudah orang ke mangku pengawa nya, Daniel Jubang nembuka timpuh tiga penggal.
Pengawa bedara tu diatur nyerumba Pengawa Bepilih Besai Nengeri ti Ke-11 (PRN11) tu ila, digulu raban penyukung Barisan Nasional ( BN) ngemenuhka palan nya.
Sekeda pemesai politik parti komponen ari Parti Pesaka Bumiputera Bersatu (PBB), PRS, Parti Demokratik Progresif Sarawak (SPDP) eng- gau Parti Sa’ati Rayat Sarawak (SUPP), raban ketuai komuniti sereta raban ketuai gerempung ukai dikuasa perintah (NGO) bukai.
Raban pemesai ke datai tu nyengkaum Pemancha Yong Thu Fook, Pengulu Wong Kie Ing, Pengulu SIa Shui Poh, Pengulu Sallang Batang, Kapitan Micky Ngu Kong Siong, Chairman Gerempung Bansa Dayak Sarawak (SDNU) Pamppang Kapit, Joseph Jinggut, Chairman Serakup Dayak Iban Sarawak ( SADIA) Kapit, Edward Manggah, sereta beratus iku ke bukai.
Dalam jaku dipansutka iya, Jamit meri besai terima kasih ngagai raban ke ngatur pengawa bedara nya ke diketuaika Tuai Rumah Daniel Dian ke mega bejalaika pengawa ba Palan Servis PRS Pelagus nya.
“Tu kelai sukung ke manah diayanka kita ngagai kami duai seraya kami duai ulih meda timbal raban ari renggat nembiak redak sentang pekara ke bisi nyadi sereta peminta sida.
“Parlimen udah nerima pemutus penumbuh 11 sitak kunsil nengeri ke baru di Sarawak lalu rambau PRN tu iya, bisi 82 penuduk enti dibanding sebedau tu semina 71 penuduk aja. Penuduk ke baru nyengkaum di Kapit; Murum enggau Bukit Goram.
“Bukit Goram tu diambi ari Pelagus di baruh P215 Kapit lalu Murum ari Belaga di baruh P216 Ulu Rajang. Diatu bisi enam sitak kunsil nengeri di Kapit; Murum, Belaga, Baleh, Pelagus, Bukit Goram enggau Katibas. Kapit mungkur semak sebagi ari tiga pemesai menua Sarawak, bisi 11,400 iku rayat lalu enti dikira bisi tiga iku per kilometer sereta bisi 548 buah rumah panjai enggau tumpuk pendiau,” ku iya nerang silik.
“Gaya rampa menua bebukit tu meri enchabar bejalaika perambu pemansang lalu nengah pengada dua sitak kunsil bepilih ke baru tu dikearap ulih ngemujur sereta bejalaika pemansang enggau manah agi,” ku Jamit.
Rambau PRN tu ila, Nyabong enggau Jamit bela minta ngagai semua pengundi di sitak nya ngundi chalun ke bediri ngarika BN. Semua parti dalam gempung BN endang enda beperara ari pangan diri lalu seruran bekerejasama ngambi pulai baru penuduk ari penyakal lalu tejuka pengawa milih sapa bagi chalun ke patut bediri ngagai ketuai tinggi dalam BN empu.
Nya alai, dikena nentuka BN ulih ngambi pulai penuduk Bukit Goram ari penyakal, kitai patut mantaika peminta ke terang ari pengundi di Kapit meri sukung penuh sida ngagai Kepala Menteri Tan Sri Adenan Satem laban polisi menua pesisir mai pemansang infrastruktur deka pulaika penguntung ngagai sida.
Pia mega, Tuai Rumah Rabar Nasat dalam jaku dipansutka iya ngenang jaku ti kala dipansutka Menteri Pemansang Tanah Sarawak, Tan Sri Datuk Amar Dr James Jemut Masing ba sebengkah pengerami diatur di Toa Pek Kong Hock Leng Ten dalam bulan Julai 2015 tu tadi ngagai raban komuniti China, madahka peminta raban komuniti nya dikemendarka perintah lalu tu awak sida malas jasa perintah nengah undi rambau PRN.
“Pekara tu beguna amat dikena negapka sukung ngagai perintah BN laban semua raban Bumiputera ditu nyukung BN ngambika BN ulih menang enggau majoriti ke besai,” ku Tuai Rumah Rabar.