Penyandang DUN Tupong dikenuku nadai bediri agi

KUCHING: Kepala Menteri Datuk Patinggi Tan Sri Adenan Satem ti mega Chairman Barisan Nasional (BN) Nengeri udah ngenukuka penyandang sitak Kunsil Nengeri (DUN) Tupong ke diatu, Datuk Daud Abdul Rahman enda bediri agi maya Pengawa Bepilih Besai Nengeri Ke- 11 ( PRN11) tu ila.

Maya madahka pasal pekara nya, Adenan mega ngenukuka penyandang ke agi ngetanka sitak diri iya nya Sharifah Hasidah Sayeed Aman Ghazali ba DUN Semariang, Datuk Amar Abang Johari Tun Openg (DUN Satok) , Dr. Hadzland Hipni (DUN Demak Laut) enggau Dr. Abdul Rahman Junaidi (DUN Pantai Damai) lalu semina DUN Tupong aja dipadah iya deka bisi chalun baru.

“Baka kitai bukai, Shaarifah Hasidah, Abang Johari, Dr. Hadzland enggau Dr Abdul Rahman kita nemu reti…Bisi tiga bulan agi,” ku Adenan.

Iya madah munyi nya lebuh bejaku bejadika ‘Majlis Perasmian Agenda DBKU 2016’ di Taman Sukma Ria ditu, kemari.

PRN ke-11 dijangka deka diatur dalam kandang entara tengan bulan March enggau April ke deka datai.

“Beri aku peluang lima taun agi nyadi Kepala Menteri kita, agi mayuh pemansang ke deka digaga kitai. Nya alai, ngarapka rayat bekerejasama enggau semua pengari rayat diri.

“Pilih Dachin… Laban semina Perintah Barisan Nasional (BN) aja ke bisi duit mai pemansang ungkup menua enggau rayat,” ku iya.

Ba sentang DUN Tupong ku iya, Daud udah madah ngagai Adenan iya deka nyurutka diri ba PRN Ke11 tu ila.

“Kitai deka ngiga orang bukai bediri ba DUN Tupong. Kita pan nemu nama kebuah nya bansa nya, Daud udah madah ngagai aku iya deka nyurutka diri ba PRN 11 tu ila,” ku iya.

Di sitak Tupong, diberitaka dua iku chalun ke udah dipeda regas ngelawa rayat sereta didinga deka nganti Daud, iya nya Sapit Chairman Opis Kaunsil Mengeri Padawan (MPP) Dr Zaiedi Suhaili enggau Sekretari Politik Kaban Parlimen Petra Jaya (Datuk Fadillah Yusuf) Fazzruddin Abdul Rahman ti mega nyadi Ketuai Nembiak Parti Pesaka Bumiputera Bersatu (PBB) Tupong.