Dennis muji penyiru Kepala Menteri ngagai rayat nengeri tu
MIRI: Kaban Kunsil Nengeri ( ADUN) Telang Usan, Dennis Ngau muji penyiru Kepala Menteri (KM) Datuk Patinggi Tan Sri Adenan Satem ke rayat berindik ari iya ke udah minta Komiti Komunikasyen enggau Multimedia Malaysia (SKMM) ngemanahka agi servis arus penyambung di kandang menua pesisir di nengeri tu ke bisi tejanggal.
Dalam jaku dipansutka iya ditu ensana, Dennis madahka bisi tiga tiang (legit komunikasyen) penyambung di Sitak Telang Usan iya nya di Long San, Long Kevok enggau Long Pillah tang kesemua arus penyambung ba tiga tiang nya udah tejanggal lebih ari setaun ke udah.
“Pengudah ninga penerang ari Kepala Menteri kitai ke bisi minta Komiti Komunikasyen enggau Multimedia Malaysia (SKMM) nyediaka arus penyambung ke manah agi ngagai kandang menua pesisir, aku sigi nyukung pekara tu,” ku iya.
Ku Dennis iya kala mantaika peminta ngambi ngemanahka arus penyambung ke tejanggal ketegal penanggul tiang legit komunikasyen di kandang menua nya.
Ku iya madah, raban kunterikta ke dipadu bejalaika projek enggau pengawa nyaga sereta ngemanahka nya patut bejalaika tanggungpengawa sida enggau manah dikena nentuka tiang nya bisi arus penyambung.
“Enti sema sida enda ulih, sida patut meri awak ngereja pengawa nya ngagai raban kunterikta bukai, iya ke ulih bejalaika projek nya.
“Kitai enda ulih ngira periuk diri empu aja laban rayat udah kelalu lama nganti lalu deka meda penanggul nya teputar,” ku iya.
Kena Hari Lima tu tadi, Adenan minta piak SKMM ngambi beratika peminta peranak menua pesisir di Sarawak ditu sereta nyediaka arus penyambung ke manah agi ngagai kandang menua pesisir dikena ngerapatka kaul komuniti ke diau di kandang mengeri enggau menua pesisir.