Mengeri besai Kuching nyadika chunto dunya
Nadai mengeri besai bukai baka ditu ngembuan pemanah kaul entara komuniti, beresi, likun sereta manah
KUCHING: Nadai mengeri besai bukai kelimpah ari Kuching ngembuan pemanah kaul entara komuniti, beresi, likun sereta manah, ku Kepala Menteri Datuk Patinggi Tan Sri Adenan Satem.
“Pedis ngiga mengeri beresi baka Kuching. Enti kita kala meda nengeri bukai di dunya tu, baru kitai nemu baka ni ku kitai chukup untung ketegal bisi Kuching.
“Ditu bisi rayat ari mayuh pupu bansa baka China, Melayu, Iban, Orang Ulu, Bidayuh, India semua baka diri sebilik. Kitai ulih diau likun nyengkaum ulih duduk, makai, ngirup begulai enggau pangan diri,” ku Adenan lalu nandu, tiap iku rayat menua tu endang sama ngempu Kuching.
Lebuh nimbal jaku Datuk Bandar Dewan Bandaraya Kuching Utara ( DBKU) Datuk Abang Wahap Abang Julai ke minta mayuh agi geran diberi ngagai DBKU laban opis kaunsil nya deka ngaga ‘Taman Perpaduan’ (Museum Garden), Adenan madah iya besetuju.
Kelimpah ari nya mega, DBKU bisi deka ngaga projek timpuh ke panjai, iya nya Taman Burung (Birds Park) di Bukit Siol ke endur opis sida diatu, iya “Mayuh kitai suah ninga orang nyebut Burung Kenyalang tang kitai enda
“
Ditu bisi rayat ari mayuh pupu bansa baka China, Melayu, Iban, Orang Ulu, Bidayuh, India semua baka diri sebilik. Kitai ulih diau likun nyengkaum ulih duduk, makai, ngirup begulai enggau
” pangan diri. Datuk Patinggi Tan Sri Adenan Satem Kepala Menteri Sarawak
kala meda baka ni ku gamal Burung Kenyalang tu.
“Nya alai, betuaika Abang Wahap, kitai ulih nyapai mayuh program ke deka disukung Perintah Nengeri enggau Besai,” ku iya, alai Adenan bedau lama tu tadi Perintah Nengeri baru udah meri RM27 juta kena DBKU ngagai pengawa pemansang sida iya, lalu deka ditambah baru enti agi bisi program ke deka digaga DBKU.
Kelimpah ari nya, Adenan madah jurai iya ti deka datai tu enggau Perintah Besai sereta Opis Kunsil Menua (MBKS, DBKU, MPP) tu deka ngurangka chukai pintu reta tanah menua tu.
Taja bedau ditetapka agi, iya madah pekara nya antara pemerat ke deka dipejuraika enggau Menteri Besai sereta Opis Kaunsil Menua tu tang pemutus nya ku iya, bepanggai kelebih agi ba Opis Kaunsil Menua.
“Udah iya ditetapka ila, baru aku madah baru ngagai kita,” ku iya.
Hari Tiga tu ila, ku iya, iya bisi baum enggau Menteri Besai (PM) Datuk Seri Najib Tun Razak di Kuala Lumpur laban deka bejurai pasal autonomi nengeri Sarawak.
“Kitai deka ngambi pulai kuasa menua tu kelia ke udah diambi Perintah Besai. Tu antara pemun jurai ke digaga Hari Tiga tu.
“Naka tu, kitai udah mujur teulihka pemendar ari Perintah Besai ke besetuju enda ibuh ngena lisin enti sema peranak menua tu berikan ba tasik menua tu (asal enda ngelui ari tasik menua tu),” ku iya.
Kelimpah ari nya, iya madah dalam kandang tiga taun tu ila mega, urung 90 peratus (%) pengajar ke ngajar di Sarawak, semua anak Sarawak.
“Orang Semenanjung enda nemu chara kita, semina kitai aja ke nemu adat orang tu,” ku iya seraya madah mayuh macham jurai deka digaga nangkan tu ila, tang naka ke diatu pemujur ke udah digaga ngemunaska tol lalu nyengkaum enda ngaga tol ke jalai besai pan Borneo sereta nurunka rega elektrik.
Taja pia, iya madah bekait enggau royalti minyak ke dipinta naka kediatu, bedau mujur laban rega minyak ke agi turun iya nya diatu setong baru RM30.
“Pemisi Perintah agi kurang, tang enti sema rega nya niki baru ila, anang enda ingatka semaya enggau Sarawak,” ku iya.
Seiti ari pemerat jurai nya ku Adenan, ungkup ke nengeri Sarawak patut ditambah mayuh agi ari ke suba.
“Perintah Besai enda tau enda nyengkaum kitai dalam semua pengawa pemansang.
“Enti dibanding enggau Semenanjung, Sarawak agi jauh tinggal, agi mayuh bedau digaga kitai.
“Nya alai, utai ku aku, barang pemansang ke digaga di Semenanjung, Sarawak pan enda tau enda sama ampit.
“Laban kitai sama belagu lagu Kebangsaan ‘ Negara Ku’,” ku iya.
Ba atur pengawa nya kemari, Adenan bejadika seiti bup ‘City with a Soul...Unity in Diversity’.
Sama bisi enggau ngulu pengawa nya kemari, bini Kepala Menteri Datin Patinggi Dato Jamilah Anu, Sekretari Perintah Menua Tan Sri Datuk Amar Morshidi Ghani, Menteri Pengeraja Asal enggau Rampa Menua Kedua Datuk Amar Awang Tengah Ali Hassan, Menteri Pengawa Berumah Datuk Amar Abang Johari Tun Openg, Menteri Kereja Raya ti mega nyadi Kaban Parlimen Petra Jaya, Dato Seri Fadillah Yusuf enggau Menteri Muda di Opis Kepala Menteri (Pekara Islam) ke mega nyadi Menteri ke megai tanggungpengawa ba DBKU, Datuk Daud Abdul Rahman.