Perintah besemaya ngemeratka peminta peranak menua Sg Passin
SIBU: Penemuai Sapit Menteri Pemansang Menua Pesisir Enggau Kandang Menua, Datuk Alexander Nanta Linggi ngagai Sungai Passin di Pelilih Matu dalam minggu nyin tadi meri pengaga ati ngagai peranak ba enam buah rumah panjai dia.
Ketuai Komuniti Sungai Passin, Penghulu Enggan Salleh meri besai terima kasih ngagai pengari rayat sida, Kaban Kunsil Nengeri (ADUN) Daro, Safiee Ahmad ke udah mai sapit menteri empu meda pemar ke ditapi bala rayat.
Enggan madahka 180 pintu peranak rumah panjai di Sungai Passin udah idup merinsa sereta nadai ngembuan penyikap perengka guna ngelama tu.
“Pengidup di Sungai Passin betapi enggau pemerinsa ukai ketegal kami nadai pemakai tang ketegal nadai bekal elekterik, bekal ai beresi enggau jalai penyambung.
“Bala tuai rumah ke lama enggau ke baru sereta bala penghulu ari kandang menua tu seruran minta infrastruktur ninting maya sida ditanya nama peminta sida ngagai Sungai Passin,” ku iya rambau program ‘ walkabout’ Nanta ngagai Sungai Passin kena Hari Lima minggu nyin tadi.
Sama bisi datai Safiee, Pemesai Pelilih Matu Abdul Samat enggau Sekretari Poli- tik Kepala Menteri Sarawak Maurice Giri enggau Romeo Christopher Tegong.
Enggan madah bakani sida nguna belanja ke besai maya mayar chukai pintu RM4 setaun ba Opis Pelilih Matu lebuh sida agi dipinta mayar.
Ku iya, sekali pejalai mansang bayar tikit bot ekpres ari Sungai Passin ngagai Sibu berega RM20.
Ari Sibu sida ngena bot ekpres ke bukai mansang ngagai Daro enggau tikit berega RM20.
“Pejalai ari Daro ngagai Matu kami mayar suwa van lalu bisi maya seiku dichaj RM100.
“Bot ekpres ke penudi endar ari Sibu ngagai Sungai Passin urung pukul 1 ngalih hari ninting hari. Nyema kami tinggal bot nya, kami deka begunaka belanja besai agi bemalam semalam di Sibu,” ku iya.
Iya mega madahka sida endang bepanggai ba gaya hari enggau pemansut ai sungai sereta injin api dikena ngulihka bekal elekterik.
Ku iya, maya ai masin tama sida betapi enggau penanggul ngulihka pemansut ai kelebih agi musim kemarau.
Tebal agi peranak rumah panjai ngereja pengawa berikan nangkap undang.
Berebak enggau nya, Nanta dalam jaku dipansutka iya nyamin perintah deka mantu sereta ngemerat peminta peranak di Sungai Passin.
Iya mega ngarapka Safiee ulih nganjung mayuh agi peminta ngaga projek pemansang di Daro ngagai Opis Menteri Pemansang Menua Pesisir Enggau Kandang Menua (KKLW) taun baru.