Projek Sepital Petra Jaya lubah 36 peratus ari timpuh ditetap
KOTA SAMARAHAN: Projek Sepital Petra Jaya diatu bisi lubah 36 peratus ari timpuh ti udah ditetapka.
Pekara nya dipadahka Direktor Opis Pengerai Nengeri Sarawak (JPNS), Dr. Jamilah Hashim ba aum pengarang berita, kemari.
“Projek Sepital Petra Jaya diatu lubah 36 peratus ari timpuh ke udah ditetapka. Enti nitihka timpuh asal projek nya deka tembu 29 November 2016, tang ditimpuhka baru lalu dipelaba deka tembu 9 Jun 2017.
“Entara kebuah projek nya lubah laban kurang pengereja pengawa, taja pia kunteriktor ke ngaga projek nya udah besemaya deka nambahka pemayuh tubuh pengereja pengawa iya.
“Kunteriktor tu udah ditambah timpuh endur ngaga projek nya sereta deka diukum enti enda nitihka timpuh ke udah ditetapka,” ku iya madah ngagai pengarang berita.
Dulu ari nya Dr. Jamilah sama datai ngulu ‘ Majlis Konvokesyen 2016 Institusi Latihan Kementerian Kesihatan Malaysia (ILKKM)’ Zon Sarawak ke diatur ba DeTAR Putra, Universiti Malaysia Sarawak ( UNIMAS), kemari.
Nambahka nya lebuh ngenang projek sepital bukai di Sarawak, Dr. Jamilah madahka projek Sepital Sri Aman udah berengkah lalu projek nya diatu nitihka timpuh ke udah ditetapka.
Sepital Lawas, diatu ba renggat fizikal projek nya udah berengkah dipejalaika pengudah nerima ungkup belanja tambah urung RM22 juta, ku iya.
“Sepital Lawas, renggat keterubah projek nya ti udah tembu iya nya tanah, lalu diatu pengawa fizikal benung dipejalaika pengudah ungkup belanja tambah dikemendarka.
“Renggat 2A projek nya mega udah tembu magang , semina Renggat 2B ti bedau iya nya ngaga begunan, deka berengkah dipejalaika pengudah ungkup belanja tambah dikemendarka,” ku iya.
Kelimpah ari nya lebuh dipinta ngenang pasal pakej projek ngemanahka Sepital Besai Sarawak ( HUS) iya nya ngaga palan ngengkah kerita enggau hotel bajet, Dr. Jamilah madahka projek nya udah dikemendarka.
Ku iya, diatu benung dalam renggat Sempekat Konsensyen, ti dipelabakbegunaka timpuh enam bulan. Dikearapka projek tu ulih berengkah dipejalaika taun baru ti agi begunaka ungkup belanja RM378 juta.
Sama bisi dalam aum pengarang berita nya kemari Sapit Menteri Pengerai Malaysia, Datuk Seri Dr. Hilmi Yahaya; Setiausaha Bahagian, Bagi Ngatur Latih, Opis Menteri Pengerai Malaysia (KKM) Ellam Endin Nom, Menteri Kunsil Kandang Menua Sarawak Datuk Prof. Dr. Sim Kui Hian enggau ke bukai.