Raban Nembiak PRS nemuai seraya mantu veteran Sarawak Ranger di Lubok Antu
KUCHING: Raban Nembiak Parti Rakyat Sarawak (PRS) kena Hari Lima minggu nyin tadi udah nemuai ngagai Rumah Brown Nanga Stapang Jela, Ulu Engkari di Lubok Antu lalu tuju penemuai sida meri peransang ngagai sekeda raban veteran Sarawak Ranger seraya ngembing sida chara minta bantu belanja ari perintah.
Martin John Madden ngarika Ketuai Nembiak PRS, Liwan Lagang, meransang raban veteran enggau sida sebilik madah ngagai bala ke kala enggau sama gawa bukai lebuh sida nganjung peminta bantu ari perintah dikena ngubah tikas pemanah pengidup sida.
Ku iya, sida tu bujang berani ke udah nyaga pengelikun menua lalu perintah deka meri pemeri lalu nentuka pengelantang sida diintu enggau manah agi.
“Sinu endar laban mayuh sida tu diau jauh di menua pesisir sereta enda nemua pasal bantu enggau insentif ke baka tu ari perintah, nya kebuah sida tinggal. Raban Nembiak PRS deka nyidi sida sereta nentuka sida nerima bantu ti patut,” ku iya lebuhka dirandau kemari.
Kena Hari Lima minggu nyin tadi, Martin ngarika Liwan, ke mega Kaban Kunsil Nengeri ( ADUN) Belaga enggau Menteri Muda Perengka Pengangkut Sungai enggau Pengelikun udah nyuaka geran Projek Mit Pemansang Menua Pesisir ( MRP) RM13,000 ngagai Komiti Pemansang Enggau Pengelikun Genturung Pendiau (JKKK).
Bantu mata duit khas ari Raban Nembiak PRS mega diberi ngagai bala veteran ari rumah panjai nya. Sekeda ari pemeri ke bukai ngagai rumah panjai nya mega datai ari Kaban Parlimen (MP) Lubok Antu Datuk William Nyalau. Pemantu Nyalau empu, Zainie Aji bisi datai ngemendarka belanja RM44,000 dikena sida ngemanahka geladak rumah panjai nya ngena ‘tile’.
Program sehari nya udah digulu bala ketuai ari enam buah rumah panjai besemak dalam kandang menua Ulu Engkari.
Sebedau pengawa nyuaka geran, sida sebuat ngena awak berandau begulai enggau peranak rumah panjai ti ngelaluka penatai sida enggau chukup pengerami.
“PRS tu parti ti siruka peranak menua pesisir lalu kami ngarapka ulih ngatur mayuh agi penemuai ke baka tu ngagai rumah panjai ke bukai di kandang menua tu enda lama agi,” ku Martin.