Pesakit majak mayuh berubat ba sepital perintah
Dipelaba ketegal servis sereta ungkus berubat ti murah agi dibanding enggau sepital, klinik peribit
KOTA SAMARAHAN: Sepital enggau klinik perintah di serata Malaysia bisi nerima penatai pesakit ti tinggi ngalih berubat ari sepital tauka klinik peribit di menua tu.
Sapit Menteri Pengerai Malaysia Datuk Seri Dr. Hilmi Yahaya madah, pesakit ti ngalih berubat ari sepital peribit ngagai sepital enggau klinik perintah ngayanka penambah enti dibandingka enggau taun 2015.
“Naka ke diatu sepital enggau klinik perintah di serata menua bisi nerima tiga (3) million iku pesakit ari sepital peribit, enti dibandingka enggau taun nyin kemari.
“Dipelabaka ketegal servis kitai (sepital enggau klinik perintah) majak manah sereta ungkus berubat murah agi dibandingka enggau peribit, nya dipelabaka entara kebuah sida ngalih berubat ari sepital peribit ngagai sepital tauka klinik perintah,” ku iya.
Dr. Hilmi mansutka pekara nya dalam aum pengarang berita ‘Majlis Konvokesyen 2016 Institusi Latihan Kementerian Kesihatan Malaysia (ILKKM)’ Zon Sarawak, ke diatur ba DeTAR PUTRA, Universiti Malaysia Sarawak (UNIMAS) ditu, kemari.
Dulu ari nya iya nyuaka skrol ngagai 928 iku graduet ILKKM Zon Sarawak ke ngambi Setipikit, Diploma enggau Diploma Lanjutan.
Nambahka nya, lebuh ke dipinta ngenang pasal bajet 2017 ke deka dibantai Menteri Besai Datuk Seri Najib Tun Razak dipelabaka kena 21 Oktober tu, iya ngarapka ungkup belanja opis menteri nya ditambah.
“Kitai ngarapka Opis Menteri Pengerai ( KKM) diberi pengelebih laban kitai ngemeratka pengelantang rayat sereta nyawa pesakit.
“Kitai ulih mereti gaya ekonomi enda meruan, tang aku ngarapka ungkup belanja opis menteri tu ditambah tang anang dikurang,” ku iya seraya madahka bajet ke diungkupka ba taun 2016 iya nya RM23 billion.
Kelimpah ari nya lebuh ngenang pasal pengerami konvokesyen ILKKM, iya madahka dalam setaun ILKKM ke bisi 33 buah kolej dibaruh opis menteri nyeng- kaum di Sarawak bisi 4 buah kolej, mujur nempa 4,000 iku graduet setaun.
ILKKM Zon Sarawak iya nya Kolej Sains Kesihatan Bersekutu (KSKB) Kuching; Kolej Kesihatan (KK) Sibu; Kolej Kesihatan Awam (KKA) Kuching enggau Kolej Jururawat Masyarakat (KJM) Serian.
Iya ngarapka raban graduet ari ILKKM ulih nambahka penemu sereta terus belajar nambahka pengelandik dalam bidang nya.
“Kitai deka ngagihka semua raban graduet ngagai serata menua ke bedau chukup pengeraja pengawa, lalu manah agi raban graduet ari Sarawak dianjung gawa ba menua diri empu laban sida nemu sereta meretika agi gaya etnik ditu, tu ngemudahka sida gawa.
“Aku ngarapka pengudah bulih Setipikit enggau Diploma kita ulih nampung pelajar ngagai renggat ke tinggi agi baka ngambi Diploma Lanjutan tauka degree laban Opis Menteri nadai nyendiaka renggat degree, lalu nya tau diambi ba palan pelajar tinggi peribit.
“Ti pemadu beguna kitai deka sida graduet tu terus belatih sereta ngulihka pengelandik tauka penemu dalam bidang ke diambi, tu dikena nentuka semua pangku pengawa ke puang ulih diisi kelebih agi dalam bidang paramedik,” ku iya.
Sama bisi datai ba pengerami nya kemari Sekretari Bagi, Bagi Ngatur Latih KKM Ellam Endin Nom; Direktor Opis Pengerai Nengeri Sarawak Dr. Jamilah Hashim, Menteri Kunsil Kandang Menua Datuk Prof. Dr. Sim Kui Hian enggau ke bukai.
Naka ke diatu sepital enggau klinik perintah di serata menua bisi nerima tiga (3) million iku pesakit ari sepital peribit, enti dibandingka enggau taun nyin kemari. Datuk Seri Dr. Hilmi Yahaya Sapit Menteri Pengerai Malaysia