Nembiak rebak baru patut ngetanka adat, main asal: Joseph
KUCHING: Raban rebak baru patut negika main asal enggau adat bansa Iban ngambika enda punas nyerunyut pemansang teknologi dunya kemaya ari.
Kelimpah ari nya, bansa kitai mega patut tegap sereta andal enggau penatai diri, pia ku jaku Menteri di Opis Menteri Besai, Datuk Joseph Entulu Belaun lebuh ti bejadika Pengerami Makai Malam Ngintu Setaun Penumbuh Serakup Ngajat Asal Iban (NGASI) kena malam hari Lima bedau lama.
“Kitai endang patut ngetanka main asal sereta adat bansa kitai Iban ngambika enda lenyau. Ukai semina nya aja, bansa kitai pan patut ditegapka ngambi kitai nemu penatai asal kitai empu lalu anang nejuka semua utai tu punas nyerunyut pemansang dunya,” ku iya.
Joseph ke mega Kaban Parlimen (MP) Tamin madah, mayuh macham chara ngetanka adat sereta main asal, lalu chunto ke pamadu manah iya nya ngadaka kelas ngajat asal ngagai bala nembiak rebak baru. Kelimpah ari nya, suah bejaku nguna jaku asal diri mega entara chara bukai ti ulih nentuka bansa terus tegap.
“Mayuh macham chara dikena kitai ngetanka adat asal iya nya kitai ulih belajarka main asal ungkup nembiak rebak baru.
“Kelimpah ari nya ba senentang nguna leka jaku asal ulih ngetanka bansa kitai. Ungkup kita ke nembiak anang enda beratika leka jaku ti dikena sida ke tuai, kelebih agi lebuh bejalaika pengawa rasmi, enti ulih naka alah lalu meseti ngena leka jaku Iban ke betul,” ku Joseph ke udah bejadi lalu dipebasaka nyua setipikit tembu belajar ngajat serakup tu.
Serakup NGASI udah ditumbuhka kena bulan Julai 2015. Serakup tu ti betuaika Puan Kate Tingang udah muka kelas ngajat keterubah ke dikumbai Kohort 1 kena bulan September 2015 nyentuk ke taun tu udah bisi empat renggat kelas udah dipejalaika, iya nya ke penudi ungkup Kohort 4 ti tembu bedau lama. Kelas ngajat tu udah disereta urung lebih ari 50 iku sida ti ngembuan pengerindu belajar ke main asal Iban.
Ba lansa ke bukai, Chairlady NGASI Kate Tingang, mesan nuju mensia mayuh ba kandang menua besemak tauka jauh ulih ngerejista diri enggau kelas ngajat ti diatur serakup tu iya nya tau betelefon ngagai pengajar Joefrazier ba lumur 016- 858 9364 tauka ba Puan Kate empu ba lumur 019-490 6343.
Ba pengerami tu, Joseph Entulu udah meri agih belanja penyampau RM17,000 nengah dua chara iya nya RM12,000 dikena mayar pemakai lebuh pengerami malam nya lalu chek RM5,000 deka disua ungkup bejalaika pengawa ti pulaika pemaik ngagai raban serakup tu.
Sama bela bisi datai ngulu pengerami tu iya nya Sapit Sekretari Nengeri Sarawak Datu Jaul Samion, Sekretari Politik Kepala Menteri Edward Kurik, Chairman Pengatur Pengerami Briten Osup sereta temuai dipebasa ke bukai.