Sekula endur ngadaka nembiak ti landik, bepenemu
Nya kebuah apai indai patut terus meri sukung ngagai sekula ba pengawa ngiri penemu ngagai anak sida
SRI AMAN: Sekula nyadi palan beguna endar ba pengawa nempa raban nembiak sekula ngembuan pengelandik enggau penemu ke tinggi di menua tu, pia ku Kaban Kunsil Nengeri ( ADUN) Bukit Begunan, Datuk Mong Dagang.
Iya madahka pemesai guna sekula nyadi sebengkah palan pelajar bala anak sereta komuniti besemak.
“Sekula palan endur nempa nembiak ke bepenemu ti tinggi lalu ngembuan mayuh pengelandik.
“Palan tu meri empas ti besai kelebih agi ngagai komuniti, seraya ulih ngangkatka tikas pengidup,” ku iya mansutka jaku tu rambau bejaku bejadika Pengerami Makai Lemai Serakup Apai Indai Enggau Pengajar ( PIBG), Sekula Primari (SK) Melugu, Sri Aman ba Balai Suarah semak ditu bedau lama ke
Palan tu meri empas ti besai kelebih agi ngagai komuniti, seraya ulih ngangkatka tikas pengidup. Datuk Mong Dagang ADUN Bukit Begunan
udah.
Pia mega, iya muji pengawa ti dipejalaika SK Melugu ari baruh embing Kepala Pengajar, Loius Aom ke udah mayuh ngaul bala apai indai ba tetiap aktiviti ke diatur sekula tu.
Mong ngarapka bala apai indai terus meri sukung ngagai sekula ba pengawa ngiri penemu dalam mayuh bengkah pekara ngagai bala anak sida.
Iya mega bisi ngelansa bekaul pemesai guna pengelandik vokasional dalam nempa pengereja pengawa profesional ti ulih ngisi pengawa puang sereta industri ba SCORE ila.
Dulu agi ari nya, Loius Aom mega bisi meri penerang bekaul enggau sekeda pamansang ba sekula nya.
Sekeda projek ke benung dipejalai iya nya projek ngaga pengadang ari agih belanja perintah besai sereta projek ngaga pagar sekula ti diberi Sapit Menteri Dalam Menua ke lalu nyadi Kaban Parlimen (MP) Sri Aman, Masir Kujat.
Sama bisi datai Pemesai Opis Pelajar Pelilih Sri Aman, Vivien Mujah sereta Ex-Direktor Institut Pematih Pengajar (IPG) Rajang, Raymond Gai Panting, bala pengajar, bala apai indai enggau exco PIBG ke bukai.
Pengerami nya mega dirichah enggau pengawa mandangka video 57 taun SK Melugu udah ditumbuh sereta bekaraoke enggau tanda ‘poco-poco’.