LCK ngerami auditor kelab ti deka mindah
KAPIT: Kelab Lions Kapit (LCK) udah mujur ngatur pengerami makai lemai ba sebengkah palan pemakai ditu beserimbai enggau auditor kelab tu iya nya Johnny Janggau ti deka pindah endur gawa.
Johnny Janggau ke mega seiku menijar Maybank Berhad Kapit deka pindah alai endur gawa ngagai Maybank Berhad bagi menua Lawas lalu udah nyadi auditor kelab Lions kenyau ari taun 2011.
Ukai nya aja, Johnny mega aktif ba pengawa organisasyen ukai dipegai perintah. Iya seiku auditor Kelab Lions enggau mega kaban komiti Gempung Bansa Dayak Sarawak (SDNU) Pampang Kapit.
Sama bisi datai, Presiden Kelab Lions Kapit Ong Hwang Seng, Chairman Balai Dagang China Dato Yong Hua Sying, Chairman Bulan Sabit Merah Pampang Kapit Dr Sia Tih Kong, Chairman Kelab Timbak Panah Laja Pelilih Kapit, Ting King Yiing enggau ke bukai. SIBU: Gerempung Bansa Dayak Sarawak (SDNU) Sibu deka ngatur Pekit Badminton Dayak Tetutup Trofi SDNU Sibu kena 2830 Oktober ti deka datai.
Chairman SDNU Sibu Chambai Lindong madah, pekit tu diatur ba Dewan SMK Bukit Assek lalu tebuka ngagai semua bansa Dayak serata nengeri Sarawak.
“Pekit tu dibagi ngagai dua kategori iya nya kategori lelaki tebuka enggau lelaki veteran lalu bela semina diungkupka ngagai main ‘beregu’ aja,” pia ku iya madah ngagai pengarang berita.
Chambai madah, atur pekit tu enda ngemendarka sida ke udah ngarika nengeri ngambi bagi ba pekit nya.
Ku iya, tu nyengkaum baka bepekit ba Sukan Malaysia (SUKMA), MSSM, renggat sekula, kolej, universiti tauka ba dini-dini endur ti ngarika nengeri.
“Kebuah pia laban kami deka nyungkak pengelandik orang Dayak ke baru ba main tu,” ku iya nerang.
Iya madah, pekit tu natak sida ke beumur 16 taun ke atas (tebuka) enggau 40 taun ke atas (veteran).
Nambahka nya, ku iya, pemekit dipinta mai Mykad enggau setipikit pengada asal sida dikena nentuka sida endang bansa Dayak.
“Kelimpah ari nya, sida ke bukai ti beapaika Dayak bela ulih ngambi bagi ba pekit tu,” pia ku iya.
Champion ba dua bengkah kategori tu bela deka mai pulai perais mata duit RM500, trofi enggau midul lalu penuduk lumur dua deka mai perais RM300, trofi enggau midul.
Penuduk lumur tiga deka mai perais mata duit RM200 enggau midul lalu lumur empat tauka sagu ati nerima perais mata duit RM100.
“Pekit tu diatur ngena sistem ‘ kalah mati’ lalu komiti kitai maduka Ali Hassan Teck nyadi ‘Refri Kehormat’ ngemujurka pejalai pekit tu ila.
“Kelimpah ari nya, pekit tu mega deka dipejalaika bala refri ari Gerempung Badminton Sitak Sibu,” ku Chambai.
Pengawa nyabut undi deka diatur kena 28 Oktober, pukul 3 lemai ba Dewan SMK Bukit Assek.
Pom pekit enda tau laun dianjung tauka kena maya 28 Oktober, pukul 12 tengahari.
“Pengawa nyilih pemekit enda ulih digaga enti udah nyabut undi lalu bayar seiti tim iya nya RM30,” pia ku iya.
Pom tau ditanya ba Chairman Komiti Pekit Patrick Gerijeh nengah lumur 0198780129 tauka Stanley Bayang (019-4838343).