Bersih S’wak ngelanggur ngatur gempuru Bersih 5.0 ba Padang Merdeka

KUCHING: Bersih Sarawak udah nganjung surat peminta ngagai Dewan Bandaraya Kuching Utara ( DBKU) ngena Padang Merdeka nyadi palan endur gempuru likun Bersih 5.0 ti disadang deka diatur kena 19 November ti deka datai.

Mandal Chairman Bersih Sarawak, Ann Teo lebuh dikerandau madahka sida udah nganjung surat nya ngagai pengari Datuk Bandar Kuching Utara, ba Indu Opis DBKU, ensanus.

“Taja pia, kami semina dikemendar nyuaka surat nya ba kaunter nerima penatai temuai aja, ti nitih patut dianjung ngagai kaunter khas ngambika ulih minta permit.

“Ba aku, nya nadai ngawa, laban kami udah nganjung surat peminta ngagai sida (DBKU) ngambika ulih ngena Padang Merdeka,” ku iya madah ngagai pengarang berita.

Iya arapka, DBKU kelebih agi Datuk Bandar ulih meri kerejasama ti enda besiping ngagai sida sereta meri respon ngagai peminta nya.

Ku iya, Padang Merdeka dipilih nyadi palan gempuru ketegal ngembuan sejarah sereta engkeman amat nyadi palan endur ngintu pengerami ke besejarah nya baka Pengerami Ngenukuka Gempung Malaysia.

“Ba kami, Padang Merdeka ngarika penyerakup semua rayat Sarawak sereta mega ngelepaska rayat.

“Gempuru tu gempuru likun, tu mih ti deka dipandangka ngagai mensia mayuh,” ku iya seraya mantaika tagit ngelumu 5,000 iku taun tu.

Ku Ann, bebendar mantah ulah kelebih gerup ‘Baju Mirah’ ngagai pesereta Konvoi Bersih 5.

Taja pan pekara nya enda nyadi di Sarawak, tang iya minta opis bekuasa ninggang ukum ke patut ngagai sekeda orang ti ngga penyarut sereta ngachau pengelikun pesereta orang bukai.

Di tanya sentang perambu milih endur bukai enti sema peminta nya enda dikemendar, Ann madahka pekara nya benung dikerandau tang ti dikemeratka diatu iya nya Padang Merdeka.

Pengawa nyerah surat nya mujur, tang iya bisi ensiban mimit laban penatai iya ti disempulang tiga iku kaban Komiti Bersih Sarawak, keterubah endar ditagang tama ngagai begunan Indu Opis DBKU.

“Semina aku siku aja dikemendar tama nyuaka surat peminta nya ba kaunter nerima penatai temuai.

“Kami datai laban deka nyuaka surat aja, ukai deka ngaga penyarut lalu baka ti ditemu kitai, kandang opis DBKU nya endang dibuka ngagai mensia mayuh,” ku iya.

Berebak enggau nya, Datuk Abang Abdul Wahab Abang Julai lebuh dikerandau enggai mansutka sebarang penemu sentang pekara nya laban agi di menua tasik.