Tiong merambu numbuhka wang turu pengelantang ungkup sitak Dudong
SIBU: Kaban Kunsil Nengeri ( ADUN) Dudong, Datuk Tiong Thai King merambu numbuhka wang turu pengelantang, nyadi sebagi ari inisiatif dikena mantu semua peranak rumah panjai ba sitak Dudong dalam taun baru.
Ku Tiong, tuju wang turu pengelantang tu dikena mantu peranak rumah panjai ari sukut pengerai, ke lebih agi bebelika ubat ngagai sida ke sakit.
“Wang turu pengelantang tu deka diberi pulaika pemaik semua peranak rumah panjai ba sitak Dudong. Naka ke diatu, kitai agi ngiga chara pemadu manah meri bantu tu.
“Enti sema nadai penanggul, bantu tu deka diberi berengkah ari taun baru dikena mantu meli ubat ngagai sida ke sakit,” ku iya.
Tiong mansutka jaku tu rambau bejaku ba pengawa nyuaka geran Projek Mit Pemansang Menua Pesisir ( MRP) sepenyampau RM144,500 ngagai 72 bengkah Komiti Pemansang Enggau Pengelikun Genturung Pendiau (JKKK) ba sebuah hotel ditu, kemari.
Sama bisi datai Kapitan Connie Loh, Chairman Unit Bumiputera Parti Rakyat Bersatu ( UPP) Pampang Dudong, Bansa Sandah sereta Sekretari Politik Datuk Tiong, Tiong Sie Keong.
Chairman Kunsil Mengeri Sibu ( MPS) madahka iya mega deka ransing agi ngiga jalai mantu ngemanahka atap rumah panjai ke udah luya sereta tuduh, nyadi sebagi ari pemerat ba pengawa mantu rayat.
Ngelansa bekaul enggau pengawa meri geran MRP, Tiong madahka geran MRP tu keterubah diberi pengudah penuduk Dudong diambi pulai baru Barisan Nasional (BN) ari penyakal rambau Pengawa Bepilih Nengeri (PRN) tu tadi.
“Lima taun sebedau tu lebuh dipegai penyakal, majoriti rumah panjai di Dudong nadai nerima geran MRP tauka projek pemansang.
Tang diatu ku iya, peranak udah ngasaika geran MRP sereta sekeda projek pemansang baka jalai alun, jematan enggau ke bukai sereta ngenataika peminta sida ngagai pengari rayat BN ke udah dipilih.
“Aku deka bebendar ngulihka belanja ari perintah nengeri dikena bejalaika semua projek ti pulaika pemaik semua rayat ba sitak Dudong,” ku Tiong ke mega nyadi Chairman UPP Dudong.
Tiong meri terima kasih ngagai semua peranak di Dudong, kelebih agi bala pengundi ti udah meri sukung ngagai iya rambau PRN tu tadi.