PBSM Bintulu mantu peranak Rh Inang di Sebauh

BINTULU: Gerempung Bulan Sabit Merah (PBSM) Bintulu ensanus udah nyadung sekeda bantu barang pemakai ti beungkus RM3,200 ngagai peranak rumah panjai ke tasah angus ba Rumah Indang Sungai Selagoi, Labang di Sebauh kena bulan September tu tadi.

Sekeda ari bantu nya nyengkaum barang pemakai, ai irup sereta gari.

Bantu tu udah disuaka Sekretari PBSM Bintulu, Lai Chee Hua ngagai Tuai Rumah Indang Abok.

Nitihku Indang, api berengkah nganguska rumah panjai nya urung pukul 8 malam kena 28 September ngujungka 230 iku ari 32 pintu nadai rumah agi endur diau.

Ku iya, genap ruang bilik napi pengerugi urung RM30,000 dalam penusah ti dipelaba bepun ari dapur gis ari sepintu ke angus.

“Naka ke diatu, kami nerima mayuh bantu ari mayuh bengkah ejensi perintah, peribit, Gerempung Ukai Dikuasa Perintah ( NGO) nyengkaum bantu ngenyit ari sekeda pengari rayat.

“Diatu kami agi nganti kunteriktor ngerataka tanah sebedau kami ulih ngentak rumah panjai baru lalu aku deka seruran mai pekara tu ngagai opis bekuasa bekaul,” ku Indang ngagai The Borneo Post.

Iya ngarapka ejensi perintah bekaul ulih mantu ngeyampatka pengawa nyungkur tanah endur ngentak rumah panjai baru.

“Aku deka ngena awak tu meri besai terima kasih ngagai barang sapa ke datai meri bantu sereta nyediaka semua bansa bantu kelebih agi ejensi perintah, peribit enggau kaban NGO,” ku iya nambah.