Peranak menua pesisir patut ngubah runding, ku Ugak
KAPIT: Peranak menua pesisir kelebih agi ke diau ba rumah panjai patut ngubah runding sida ngagai tuju ke betul ngambika sama ngasaika pengelantang sebaka enggau tikas pengidup orang ba mengeri.
Kaban Parlimen (MP) Hulu Rajang, Datuk Wilson Ugak Kumbong, mansutka jaku tu ba program Ketuai Begulai enggau Rayat, Rumah Juntan Engkang, Nanga Elik, Sungai Sut Bena, Balleh apin lama ke udah.
“Kami, pengari rayat ke baru, ukai semina deka meda rayat menua pesisir idup seriris enggau sida ba mengeri ke udah lama ngasaika penyamai bisi perengkaguna pemun, tang mega deka ngubah pengidup ke tikas ti manah agi,” ku iya.
Ugak mega ngelalau sekeda rayat anang kelalu kepapas enti nyema tanah ke udah diperimba bisi kena pansa projek perintah endur begagaka jalai dudi hari ila.
“Kitai enti ulih anang ransi, anang kepapas ati enti sema tanah endur kita betanam betupi dipansa projek perintah begagaka jalai alun.
“Enti sema jalai udah bisi, sigi mayuh perengkaguna pemun ulih dikemansang ba endur kita baka elekterik, tiang telekomunikasyen benung digaga enggau bekal ai beresi.
“Pia mega asil betanam betupi kita ulih dijual lalu ulih mulaika penguntung ngagai kitai semua,” ku Ugak nandu.
Nberindik ari tu, Ugak ngelalau sida ti ngulu pengerami tu, nyema nadai penanggul ti ditapi bala kunteriktor bejalaika projek perintah ti begagaka jalai, pemansang sereta pengelantang deka jampat agi diasaika peranak menua pesisir.
“Ukai semina seiku aja ke ngasaika penyenang enti sema datai jalai tang mega bala anak sereta uchu senang deka ngundang kita jemah ila. Bekerejasama mih enggau perintah, anang mantah,” ku iya nerang.
Beserimbai enggau program tu, iya udah meri RM4,000 ngagai Serakup Indu Rumah Juntan dikena sida iya bejalaika pengawa rumah panjai ti pulaika pemaik.
Sama bisi datai, Pemesai Opis Pelilih Bukit Mabong Douglas Pungga, Sapit Residen Kapit Minggu Jampong, Pemesai Bomba Kanan I Sengiang Usat, Pengari Opis Pelilih Kapit James Sandak, Pemancha David Dian, Penghulu Salang Batang, Penghulu Undie, Kunsilor Ellison Silo Bilon, Sapit Direktor Opis Pengereja Pengawa Khusairy Pangkas enggau ke bukai.