PBK bedau berundingka chalun ti engkeman ngarika parti maya PRU-14
SIBU: Parti Bumi Kenyalang (PBK) empai berunding tang enda ngenggai madahka diri nyangka deka ngirai chalun ari parti sida bediri maya pengawa bepilih ti deka datai ila.
Sekretari PBK Lanang Frankie Anong madah, pemutus nya deka digaga enti parti sida kering agi nyengkaum nambah ngagai dua tauka tiga iti agi pampang parti ba nengeri tu.
“Kediatu kami empai datai ba runding deka ngirai chalun bediri maya pengawa bepilih ila tang pekara nya nyangka nyadi.
“Semua tu deka dirandau dulu sebedau pemutus ulih dipadah ba mua bala mayuh,” pia ku iya madah ngagai pengarang berita, kemari.
Dulu agi ari tu, PBK ba aum media madahka diri sehari tu (kemari) numbuhka PBK pampang Lanang ti bela sama numbuhka PBK Pampang Miri di Miri.
Sebedau tu, PBK Pampang Sarikei udah ditumbuhka bulan Ogos tu tadi.
Nambahka nya, Frankie ti ngarika parti sida madah, naka ke diatu mega sida nadai berunding deka bekerejasama begulai enggau Parti Pribumi Bersatu Malaysia (PPBM) maya Pengawa Bepilih Besai (PRU-14) ila.
Ku iya, tu tampak dipeda ari tuju dua bengkah parti tu ti enda sebaka.
“PBK lebih agi ngemeratka pengawa deka ngeringka hak rayat Sarawak ti dipeda majak lenyau sepengudah Sempekat Malaysia 1963. Nya tuju parti kami.
“Kami nadai berunding deka begulai enggau PPBM,” ku iya nerang.
PPBM sebengkah parti politik ti betuaika ex-Menteri Besai Tun Dr Mahathir Mohammad lalu Tan Sri Muhyiddin Yassin nyadi presiden nya.
Ngena awak tu, Frankie nesau semua rayat Sarawak nyengkaum Sabah enda ngira bansa enggau jalai pengarap bela ulih nyadi raban parti sida.
Ku iya, tuju PBK endang ngeringka hak rayat Sarawak baka hak sepengudah Sempekat Malaysia 1963.
Iya madah, mayuh sejarah menua tu enda diajar ba sekula tang tebal agi mantaika sejarah ari Malaya.
“Berindik ari nya, kitai ngarapka PBK ulih disukung genap iku rayat Sarawak lebih agi sida ke rebak baru bela ngemujurka kuing parti tu,” pia ku iya.
PBK ke diatu udah bisi 600 iku raban nyengkaum 100 iku ke baru nganjung nama ngagai parti.
Raban PBK Lanang ke bukai ti bela bisi datai maya tu iya nya Yu Chin Liik enggau Lau Ren Siong (Penyanding Penemu Pampang Parti), Johnny Ting Kok Soon (Chairman) Siew Woo Lee (Sapit Chairman), Wong You Lee (Sapit Sekretari), Law Chik Tiing (Tukang Wang), Ling Mee Hua (Sapit Tukang Wang), Yii Sie Tung (Ketuai Publisiti), Ong Dai Yan (Ketuai Raban Nembiak), James Ting (Sapit Ketuai Raban Nembiak).
Komiti ke bukai iya nya Ong Dai Song, Lai Chee Chuan, Andy Wong, Tang Lung Soon enggau Elson Ling.