Lumba enggau main patut diperati ari sukut positif
Kelimpah manahka pengerai pengawa tu ulih nempa kerejasama sereta negapka kaul ba pupu raban bansa
BINTANGOR: Pengawa lumba enggau main ukai semina mai pemanah ngagai pengerai aja tang mega tau nempa ulah kerejasama kelimpah nyintal kaul pupu raban bansa.
Ketuai Sekretari Politik Kepala Menteri Abdullah Saidol madah, rayat menua tu endang rindu ke pengawa lumba enggau main tang enda mayuh ngereja iya.
Ku iya, penemu madahka lumba enggau main semina dikereja dikena ngisi awak lepa patut bendar diiyarka lalu meda pengawa tu nengah jalai ti positif.
“Tu diumbaka enggau ubah teknologi maya hari tu baka penumbuh laman rama Facebook enggau macham bengkah agi, rebak baru mayuh agi muai awak ba pekara tu.
“Nya alai, mayuh ari sida enda rindu ba pengawa lumba enggau main ngujungka bisi nya enggai begulai enggau orang bukai,” pia ku iya madah.
Iya mantaika jaku tu maya bejadi Hari Lumba enggau Main Menua renggat Pelilih Meradong ba Stadium Chen Ling Mei, SMK Kai Chung ditu, empai lama tu tadi.
Serak tu, program nya diatur Opis Pelajar Meradong.
Tuju program tu iya nya deka nyapai juluk ati perintah nengah Opis Menteri Nembiak, Lumba enggau Main (KBS) deka mai mensia mayuh rinduka pengawa lumba enggau main ti nyadika sekeda ari pengawa ke dik- eraja dalam pengidup.
Nengah program tu mega, mensia mayuh deka lebih agi nemu nama bagi pemesai guna pengawa lumba enggau main seraya ke ngadaka pengidup bepengerai sereta ngadaka pengelikun dalam rayat pupu bansa.
Abdullah ti mega Kaban Kunsil Nengeri ( ADUN) Semop maya tu minta perintah berunding ngatur Hari Lumba enggau Main tu berebak enggau Hari Main Asal serata menua.
“Pengawa baka tu engkeman bendar enggau gaya maya hari tu alai sekeda orang ti enda manah runding rindu nempa cherita bula ngujungka tau ngasuh penyarut nyadi.
“Nya alai, kitai meseti chakah agi ngatur program ti bekaul enggau kaul mensia mayuh ngambika ulih nyintal kaul enggau pangan diri kelimpah nemu agi bebasaka orang bukai,” ku iya madah.
Program sehari nya disempulang macham bengkah main baka ‘ senamrobik’, belanda 10,000 singkang enggau tikit benasit sereta digulu lebih 2,000 iku mensia mayuh.
Sama bela bisi datai maya program tu iya nya Pemesai Opis Pelilih Meradong Mastapa Julaihi, Ketuai Opis Pelajar Meradong Abang Ismail Abang Mahamud, pengari Ketuai Polis Meradong Inspektor Mohamad Ayub, ketuai pengatur program Faziela Hashim enggau Pemancha Suhaili Bujang.
Nya alai, kitai meseti chakah agi ngatur program ti bekaul enggau kaul mensia mayuh ngambika ulih nyintal kaul enggau pangan diri kelimpah nemu agi bebasaka orang bukai. Abdullah Saidol Ketuai Sekretari Politik Kepala Menteri