S’wak terus nagih hak, perintah besai patut nitih sempekat

BINTULU: Sarawak deka terus nagih hak bekaul enggau kuasa sereta status ba pekara ngemaruhka penuduk nyadi nengeri pengudah 50 taun ke udah baka ti udah bisi dalam Sempekat Malaysia 1963.

Kepala Menteri Datuk Patinggi Tan Sri Adenan Satem madah, perintah nengeri ngaga peminta dalam aum Dewan Rayat ti deka datai bekaul enggau pekara perintah besai ti enda beratika ripot komiti antara perintah bekaul enggau AKta Malaysia, Sempekat Malaysia 1963 enggau Dikenuku Komiti Pemansik Cubbold.

“Hak tu ditagih ngambika nengeri tu menyana agi. Iya patut diberi nitihka pematut ba peminta Sarawak ukai terus ngemaruhka Sarawak semina nyadi sebagi ari nengeri di Malaysia aja,” ku iya.

Iya mansutka jaku nya rambau bejaku bejadika Aum Deligit Tiga Taun Sekali (TDC) Parti Rakyat Sarawak (PRS) ke-4 ba Dinner World Bintulu Sentral kemari.

Sama bisi datai Sapit Kepala Menteri ke lalu nyadi Presiden PRS, Tan Sri Datuk Amar Dr James Jemut Masing, Sapit Kepala Menteri Datuk Amar Douglas Uggah Embas, Sapit Presiden PRS, Datuk Joseph Entulu Belaun, Presiden Parti Sa’ati Rayat Sarawak (SUPP) Datuk Dr Sim Kui Hian, pengari Parti Demokratik Progresif(PDP), bala pengari enggau pemerati.

Ku Adenan, Sarawak deka nerang ngagai perintah besai alai sempekat antarabansa, enda ulih diterima dalam pengawa ngubah Konstitusyen Perintah Besai ketegal nya ba luar bidang konstitusyen.

Nya alai, ngaga sebarang ubah, sempekat tu patut dipesetuju kededua piak,” ku iya ke lalu nyadi Chairman BN Sarawak.

Kepala Menteri madahka diri berasai asa laban lebih 50 taun bisi pengurang ba hak Sarawak ari baruh sempekat tu.

“Nya alai kitai patut terus ngemai pekara tu ke mua. Kitai besetuju dalam sekeda pekara tang nya enda chukup, alai kitai deka neruska pengawa tu,” ku iya seraya nambah, kerejasama semua piak patut dalam nyapai juluk nya.

Berindik ari nya ku Adenan, iya dekaka PRS nyukung pengawa tu laban lebuh mayuh piak mantaika peminta, iya deka ngemuntangka agi peminta Sarawak dipending.

Komiti Pemansik Cubbold iya nya komiti ti ditempa begulai perintah British enggau Federasyen Malaya dalam taun 1962 dikena nentuka timbal rayat Borneo Utara (diatu Sabah enggau Labuan) enggau Sarawak sekalika nyukung perambu numbuh tauka nempa Federasyen Malaysia ari Federasyen Malaya, Singapura, Borneo Utara enggau Sarawak.

Komiti tu mega bisi tanggungpengawa nusun baru Konstitusyen nyadi Konstitusyen Perintah Besai 16 September 1963.

Berebak enggau nya ku Adenan, Sarawak enda ulih bebatak asur ba pekara nadai pemansang enggau penyeranta sepemanjai nyadi nengeri dalam Malaysia.

“Nyema 10 tauka 20 taun ke udah, kitai meretika iya tang ukai lebih setengah abad. Kitai enda ulih bebatak asur agi laban udah kelalu nadai nerima sebarang timbal ngujungka pekara tu diteju pia aja,” ku iya nyemetak.

Iya madahka, perintah nengeri tu empu bejalaika inisiatif nyediaka agih belanja RM500 juta ngemanahka perengka guna di menua pesisir.

“Sekeda ari iya Jalai Besai Pan Borneo ukai semina semaya ngapa tang diatu benung digaga pulaika pemaik ngagai rayat. Kitai mega deka merambu ngaga Jalai Besai Pesisir,” ku iya seraya nambah projek tu pangka ari penegap politik di nengeri tu.

Ku iya, perintah enda ngenggaika pemansang di Sarawak nambah tang kitai dekaka manah agi enti dibanding enggau sekeda nengeri ke bukai.

Ku iya, Sarawak nyangka enda laun minta lalu deka terus nagih hak diri empu.