Atur perintah ti enda bechiping ngujungka nengeri tu meruan likun
TEALAGA AIR: Atur perintah ti enda bechiping kelimpah ti bebasaka main asal genap pupu bansa di nengeri tu udah nempa Sarawak nyadi nengeri ke likun, ku Sapit Kepala Menteri Datuk Amar Abang Johari Tun Openg.
Ku iya, main asal tetiap pupu bansa ukai seiti penanggul ke besai lalu semua nya dipebasa tajapan Sarawak betuaika Kepala Menteri enggau Sapit Kepala Menteri ti megai pengarap Islam.
“Nya semina main asal lalu nadai kaul enggau jalai pengarap. Kitai seruran meri basa lalu nadai penanggul sentang pekara nya.
“Jalai pengarap kitai (Islam) pan ngajar kitai ngambi bebasaka main asal bansa bukai baka ke pengawa miring ba adat Iban,”ku iya.
Abang Johari mansutka jaku nya ba “Konvensyen Saudara Kita Renggat Nengeri Sarawak ke 6 ke diatur di Palan Pematih Sarawak, Opis Pemansang Islam Malaysia (JAKIM) di Telaga Air, kemari.
Iya ke mega Menteri Pengawa Berumah enggau Urbanisasi sereta Menteri Dagang Temuai, Seni enggau Main Asal nambah nadai salah ungkup orang Islam ngaul diri ba main asal ke dikemeran bansa bukai.
Tang ku iya, anang aja kitai (orang Islam) makai pemakai ti ‘ haram’ ( ditagang) lalu ketegal pengangkun ngagai pengarap diri, begulai enggau bansa bukai ke megai pengarap bukai ukai penanggul ke besai.
Ngenang kaul bukai, Abang Johari madah seiti genturung pendiau endur ‘saudara baru’ diperambu ditumbuh di Sri Aman sebaka enggau projek berumah Darul Hana di Kuching enggau Kampung Datu di Sibu.
Ku iya, genturung pendiau nya ila ukai semina endur orang Islam aja tang mega endur orang ke megai pen- garap bukai.
“Kitai keran numbuhka seiti genturung pendiau Islam ke nyadi chunto pemadu manah.
“Kitai enggai semina ngaga rumah aja, tang deka ngayanka pengidup orang Islam ke manah,’ku iya.
Bela datai Yang Dipertua Majlis Islam Sarawak Datu Misnu Taha.