PEDAS seruran chakah ngenataika bantu ngagai bansa Dayak ke tusah
SIBU: Serakup Dayak Sarawak (PEDAS) seruran chakah bejalaika pengawa ngenataika bantu ngagai bansa Dayak ti ditemu betapi enggau penusah.
Empai lama tu tadi, gerempung sida datai nganjung tulung ngagai Sebau Gan @ Bonybibo ba Rumah Raymond Salang, Nanga Lioh, KM 1, Jalai Entabai/Julau.
Sebau sebedau tu diberitaka napi penyakit kemi manis ti ngujungka kaki kanan iya ditetak berengkah ari patung ke baruh.
Nambahka nya, iya mega bisi seiku anak ti timpang pendiau (OKU) kenyau ari mit.
Berindik ari nya, PEDAS ti ngembuan ati sinu betuaika Chairman PEDAS Sibu Mathew Mudai enggau urung 20 iku raban PEDAS Sibu datai ngelawa Sebau.
“PEDAS serata Sarawak udah besaup ngiga turu dikena ngelempungka agi tating pengidup Sebau sebilik.
“Kitai ukai semina sinu tang pengawa nyaup tauka besuaka tulung ngagai bansa Dayak ti ditinggang penusah lebih agi baka enggi Sebau tu endang seiti ari batang tuju penumbuh PEDAS,” pia ku iya madah.
Nambahka nya, iya mega andal amat piak bukai nyengkaum baka Opis Pengintu Pengelantang ulih tebuka runding bela datai nyuaka bantu ngagai Sebau.
Ku iya, diatu Sebau randaka bantu baka ‘kerusi roda’ enggau kaki gaga (palsu).
“Semua bantu baka tu tau bendar ngelempungka mimit penusah ke ditapi Sebau.
“Ngarapka nangkan ke tu mensia mayuh ke bukai anang enda sinu ke iya nengah pengawa besuaka bantu enda milih mimit tauka mayuh,” ku iya madahka baru.