Pengawa media nyaup perintah patut dipuji
Sida nyaup perintah ngelaban keruga penyalah makai suap, nebang batang nadai belisin, salah guna kuasa
KUCHING: Pengawa media ti mantu perintah nyaup ngelaban keruga penyalah makai suap, pengawa ngereja batang nadai belisin enggau salah guna kuasa patut dipuji, ku Kepala Menteri Datuk Patinggi Tan Sri Adenan Satem.
Kelimpah ari nya iya madah pengawa media mega udah matak sukung rayat ba atur ngulihka kuasa dipulaika ari Perintah Besai ngagai Sarawak
“Ari penerang ke diterima nyengkaum ari media, kitai udah nemu diak pengawa kitai ngemunas penyalah makai suap diterima manah ngujungka rayat nyukung perintah ba pengawa bepilih ke udah.
“Kitai ngenataika pinta ngagai rayat nengah komuniti media ngambi meri Barisan Nasional ( BN) Sarawak majoriti besai ti meri pengelantang ngagai kitai nagih mayuh agi agih belanja ari Perintah
Ari penerang ke diterima nyengkaum ari media, kitai udah nemu diak pengawa kitai ngemunas penyalah makai suap diterima manah ngujungka rayat nyukung perintah ba pengawa bepilih ke udah. Datuk Patinggi Tan Sri Adenan Satem Kepala Menteri Sarawak
Besai ungkup pemansang Sarawak,” ku iya.
Adenan mansutka jaku nya ba “Kenyalang Journalism Awards 2016’ ke diatur di seiti hotel ditu malam ensanus ke alai teks jaku iya dibacha Menteri Pengintu Pengelantang, Orang Indu enggau Pengelantang Komuniti Datuk Fatimah Abdullah.
Ketegal nya ku Adenan nambah, Perintah Sarawak meri jaku puji ngagai raban media ti udah nyendia publisiti sentang pinta perintah ngulihka sukung rayat.
Adenan ngasai media udah nyadi cheremin komuniti ti nerenak pengadang ba sentang sosio- politik enggau ekonomi.
“Ba atur bejalaika tanggungpengawa nyendia penerang ngagai perintah, komuniti kelimpah nyadi churung endur rayat ngenataika pinta demokratik, kita ( media) udah bejalaika pengawa nya enggau manah,’ku iya.
Adenan lantang ati enggau pengawa raban media ti udah nyendia penerang ba isu ke baru ngagai komuniti baika nya isu dalam nengeri, nasional nyengkaum entarabangsa.
Pemberita Utusan Borneo Agens Tugong bulih gelar champion ba kategori Jaku Malaysia ( Sustainability Journalism Award) enggau Harry Lias ba penuduk lumur dua ungkup kategori berita lumba.
Kelimpah ari nya dua iku pemberita Utusan Borneo , Lina Kunjak enggau Judan Bungap teulihka penuduk lumur dua enggau tiga ungkup kategori Jaku Iban.
Ungkup ketagori Jaku English, tebal agi kategori ke dipekit, gelar champion pulai ngagai pemberita ari The Borneo Post.