Pengurang Bajet 2017 nadai meri pangka ngagai NREB: Wan Junaidi
KUCHING: Opis Menteri Pengeraja Asal enggau Rampa Menua (NREB) ulih nerima sereta meretika Bajet 2017 ke diungkupka ngagai opis menteri nya, ke dibantaika Menteri Besai Datuk Seri Najib Tun Razak kilah ensana.
Menteri iya Dato Sri Wan Junaidi Tuanku Jaafar madahka diri ulih meretika kebuah Menteri Besai ti enda nerangka enggau silik laban menteri nya ngembuan agenda ti besai sereta mayuh.
“Aku udah mansik tusun bajet nya, bisi pengurang tang nya enda meri pangka ngagai opis menteri. Menteri Besai dalam bajet bisi ngemeratka pasal pengelikun pemakai, pengelikun ai enggau pengawa nyaga kampung enggau ke bukai agi, ba aku nya udah chukup.
“Opis menteri sebedau tu minta bajet ke jauh besai ari ke udah diungkupka, lalu ukai aku madahka nya enda nitihka peneka tang nya meh penyampau ke ulih diberi perintah ngagai opis menteri aku.
“Aku arap bendar opis menteri deka dikemendarka ungkup belanja dalam Rolling Plan bukai enti nyema opis menteri minta ungkup belanja ke lebih nyema enda chukup dikena bejalaika projek opis menteri,” ku iya lebuh dirandau raban pengarang berita, kemari.
Dulu ari nya iya ke nyadi opis menteri nya udah ngatur Hari Rampa Menua 2016 Renggat Nasional ke diatur ba Tebing Ai Kuching ditu, ke udah dipenyadika Kepala Menteri Datuk Patinggi Tan Sri Adenan Satem.
Ngenang baru pasal bajet nya, wan Junaidi madahka Menteri Besai beratka pengawa nyaga enggau ngetanka kampung di nengeri tang begunaka kerejasama perintah nengeri enggau besai.
Kelimpah ari nya, Hari Rampa Menua 2016 ti ngena rambai jaku ‘Alam Sekitar Tanggungjawab Bersama’ enggau juluk deka nempa tanggungpengawa nyaga rampa menua ba rayat Malaysia.
Objektif Hari Alam Sekitar Negara dikena ngelakuka pelajar enggau penyedar pasal nyaga rampa menua sereta nyendiaka platform ngagai rayat Malaysia sama ngambi bagi ba pengawa tu.
Nyerumba Hari Rampa Menua tu, Anugerah Langkawi 2015/2016 dikena meri basa enggau gelar ngagai orang seseiku rayat Malaysia sereta organisasi ti berejista di Malaysia ke udah ngayanka pemeri ti signifikan dalam bidang rampa menua sekalika nengah atur pengawa, pengawa dagang, pemansik saintifik, akademik, enggau ke bukai.
Anugerah Langkawi kategori seseiku diterima Kepala Direktor Insitut Kefahaman Islam Malaysia Prof Datuk Dr. Azizan Baharuddin enggau Kategori Serakup diterima Majlis Bandaraya Shah Alam (MBSA) ti mai pulai Sijil Pengiktirafan ke disain Seri Paduka Baginda Yang Dipertuan Agong, Plak Penghargaan enggau mata duit sepenyampau RM10,000.