Politik S’wak likun asil kerejasama parti BN
Tu nyengala dipeda nengah pemujur besai ke udah dijapai parti BN ba PRN ke udah
BINTULU: Sarawak diatu ngasaika penegap ba politik enti dibanding enggau sekeda nengeri bukai asil ari kerejasama rat antara parti komponen Barisan Nasional (BN) di nengeri tu.
Kepala Menteri kelalu nyadi Chairman BN Sarawak, Datuk Patinggi Tan Sri Adenan Satem madah, kerejasama rat mega ulih dipeda bisi antara BN enggau Parti Rakyat Sarawak (PRS).
Ku Adenan, rambau Pengawa Bepilih Nengeri (PRN) tu tadi, iya enda ngenggaika pemujur besai dijapai perintah ke diatu asil kerejasama rat semua parti BN.
“Nya alai, aku nandu pekara ti dipansutka Tan Sri Datuk Amar Dr James Jemut Masing iya nya kitai enda nerima parti luar laban sapa ke lebih nemu peminta enggau pekara nengeri tu enti ukai peranak asal ditu empu,” ku iya.
Nya alai, aku nandu pekara ti dipansutka Tan Sri Datuk Amar Dr James Jemut Masing iya nya kitai enda nerima parti luar laban sapa ke lebih nemu peminta enggau pekara nengeri tu enti ukai peranak asal ditu empu. Datuk Patinggi Tan Sri Adenan Satem Chairman BN Sarawak
Iya mansutka jaku tu rambau bejaku bejadika Aum Deligit Tiga Taun Sekali (TDC) Parti Rakyat Sarawak (PRS) ke-4 ditu kemari.
Ku iya, parti nengeri tu nemu agi nama pekara ti ditegi ungkup peranak Sarawak laban andal ulih bejalaika penyawa menyana agi ngagai nengeri tu.
Bekaul enggau PRS ku Adenan, PRS asal iya ari Parti Kebangsaan Sarawak (SNAP) pengudah nya ditukar ngagai Parti Bansa Dayak Sarawak (PBDS) lalu sebagi ari PBDS netapka diri terus begulai enggau PRS.
“Diatu mega bisi ayan PBDS Baru. Tang aku enda setuju pasal kerimpak raban tu enggau pekara dipejalaika sida, tang rayat nyata pintar agi milih parti ni ti ulih niri negika hak sida,” ku iya.