Penguang: Sama besaup ngemansangka pelilih Baram enggau Marudi
MARUDI: Rayat ditangkan ngambi badu ngenang penyerekang penemu sereta patut begempung baru mai pemansang lalu ngangkatka pelilih menua Marudi enggau Baram.
“Aku pechaya, pengudah timpuh lima bulan, aku pan udah nyadi pengari Barisan Nasional (BN) ke alai mayuh penyulut udah dijapai lalu kitai meseti seruran ngiga pemansang ungkup pengidup dudi hari.
“Beri mih sukung enggau kerejasama rat kita ngagai aku enggau perintah BN dikena nyamin semua ulih dipejalai enggau mujur sereta manah,” ku iya.
Datu Dr.Penguang Manggil ke mga Menteri Muda Kaunsil Kandang Menua mansutka pekara tu lebuh bejaku ba Pengerami Pemesai Begulai Enggau Rayat ba Rumah James Ugil Anak Mekun, Sungai Nakat, Rumah Panjai Bukit Song, Bakong kena ngalih hari Hari Enam nyin tadi.
Ku Penguang, ngelansa pekara nyiri pangku pengawa Ketuai Raban Bansa (Tuai Rumah) udah dichiri nengah chara demokrat lalu nitihka peneka peranak di menua nya empu.
Nya alai ku iya, anang mejal sereta mantah perintah tang ingat pekara tu nengah jalai enggau atur ke patut sereta betul. Aku empu deka mending sereta mantu bala kita.
Nangkan ke nya ku iya, ayan chunto ti manah nyadi bala ketuai raban bansa tauka ketuai komuniti. Kitai deka ngemansang sekeda infras- truktur sereta ngintu pengelantang semua rayat nadai ngira bida politik sida.
“Nya pengari rayat kita lalu aku besemaya deka magi bela projek ngagai semua peranak ke diau di Marudi.
“Aku deka gawa nyadi pengari rayat kita enggau pengeransing sereta deka begulai mai pemansang ngagai Sitak Marudi tu,” ku Penguang ke lalu nyadi Kaban Kunsil Nengeri ( ADUN) Marudi.
Datu Dr.Penguang Mang- gil bisi nyuaka chek geran Projek Mit Pemansang Menua Pesisir (MRP) penyampau RM5,000 ngagai Biro Indu Rumah James Ugil sereta RM80,000 Komiti Pemansang Enggau Pengelikun Genturung Pendiau (JKKK) Rumah Ugil ari Belanja Perintah Besai.
Sekeda bala ke bisi datai Sekretari Politik Kepala Menteri Sarawak, Alexander Asing John Sadai, Penghulu Sidu Gerang enggau bala ketuai komuniti besemak.