12 iku kaban Gerempung Foochow ari Seremban nemuai ke Kapit

KAPIT: Bisi 12 iku raban indu enggau nembiak Gerempung Foochow ari Seremban, Nengeri Sembilan nemuai kitu pengelama dua hari lalu pengawa pengerami makai lemai dikena ngelaluka penatai sida udah mujur diatur ba sebengkah palan makai ditu.

Penemuai sida tu tadi betuaika Ketuai Nembiak Gerempung Foochow Seremban, Wong Chau Sing lalu iya bekunsika buah penemu enggau bala kaban Gerempung Foochow kapit ditu.

Kelimpah ari nya, bala gerempung tu tadi dibai ngabas rumah panjai Iban ba Sungai Sesibau ditu, ngelawa Fort Sylvia, muzium mit, pangau danau sereta ngelawa jalai Kapit/Song ke benung digaga.

“Pejalai ngagai Kapit nguna awak 3 jam ngena bot ekspres ari Sibu. Enti jalai ari Kapit/Song udah tembu taun 2018 ila nyadi tu deka ngemuntangka penatai bala temuai ari luar datai datai ke menua Kapit.

“Sehari tu menua Kapit endang beberita ngembuan kaul ke manah enggau bala temuai iya nya ngembuan pementas ngagai barang sapa temuai ke datai,” ku Stanley Ling, ketuai nembiak Gerempung Foochow Kapit.

“Kapit agi tubah ngembuan rampa menua ke manah sereta narit ati mensia mayuh enggau Sungai Rajang ke pemadu panjai ba Malaysia. Sungai tu mega diuan mayuh bansa ikan ke berega baka ikan empurau, tengadak, semah enggau ke bukai sereta ngembuan mayuh macham buah baka buah dabai, engkabang, rian enggau ke bukai,” ku iya.

Sama bisi datai, Chairman Gerempung Foochow Kapit, Sii Bang Ee, Kaunsilor David Wong Hau Ching, Kaunsilor Jenny Yii enggau ke bukai.