MP, ADUN S’wak patut begempung minta pulai status Sarawak nitihka Artikel 1(2)
MIRI: Semua rayat Sarawak nyengkaum Kaban Parlimen (MP) enggau Kaban Kunsil Nengeri (ADUN) patut begempung ngaga peminta ba pekara minta pulai baru status Sarawak nitihka Artikel 1(2).
Aktivis Rama Raban Bansa, Wan Zain Syed Mohdzar madah pengeransing Kepala Menteri Tan Sri Adenan Satem minta pulai baru status Sarawak ngagai penuduk asal patut disukung semua piak.
“Enti semua bala ketuai tetinggi enggau bala rayat Sarawak bela ransing nyukung peminta nya, kitai pechaya Sarawak deka sama tikas enggau Federasyen Malaya,” ku iya madah ngagai Utusan Borneo ensanus.
Iya madah pekara tu semina ulih dipejalai nyema bala MP Sarawak mantaika peminta ba pekara tu ba Dewan Ra- yat sereta maya Aum Kunsil Nengeri (DUN) Sarawak.
“Nyema semua ketuai tetinggi tu mantaika peminta ngambi status Sarawak dalam artikel 1 (2) dipulaika baru maya aum Dewan Rayat enggau DUN, aku pechaya Putrajaya deka setuju eng- gau peminta Sarawak,” ku iya nerang.
Tandu iya, nyema pekara tu enda nyapai sepenemu, Sarawak mega ulih mulaika status nya nengah undangundang enggau referendum rayat Sarawak nya empu.
“Sarawak agi jauh tinggal enti dibanding enggau nengeri-nengeri bukai, nyema status Sarawak sama enggau Federasyen Malaya, alai kitai deka meda mayuh ubah ari sukut pemansang,” ku iya.
Wan Zain madahka Sarawak tu sebagi ari piak ti nyadi Sempekat Malaysia kena 1963, enggau nya ngembuan tikas sama ti sebaka enggau Federasyen Malaya.
“Kitai bisi hak enggau kuasa sama enggau Federasyen Malaya, tang ubah ba artikel 1( 2) 1976 udah ngurangka kuasa Sarawak lalu iya patut dipulaika baru ngagai asal,” ku iya nerang baru.
Iya mega ngaku pengawa meri kuasa autonomi ngagai Sarawak patut dipejalai enggau jampat enti berate ngagai tikas Sarawak rambau Sempekat Malaysia.
“Sarawak ulih merintah diri empu enggau nadai bepanggai ngagai Putrajaya, lalu kitai mega ulih ngereja pengawa ba asil ekonomi ungkup pemansang Sarawak,” ku iya.
Sebedau tu perintah nengeri bisi juluk minta pulai baru status Sarawak ngagai ke asal sebedau ubah Konstitusyen Perintah Besai dipejalai dalam taun 1976.
Adenan madah pengawa ngubah artikel nya enda diaku sereta dikinsil laban ngelanggar Sempekat Malaysia, Ripot Komiti Antara Perintah enggau Komiti Pemansik Cubbold.