Program Randau Pemansang Rama ulih meri pemaik ngagai bala nembiak sekula
KAPIT: Program Randau Pemansang Rama ulih meri pemaik ngagai runding bala nembiak sekula laban pemujur sida dalam pengidup jemah ukai semina bepelasarka pengeregas tauka penyulut pelajar aja.
Jaku tu dipansutka Prinsipal Sekula Sekondari SMK Kapit, Azlinda Mohd Nor lebuh bejaku ba Program Penyanding Penemu enggau Advokasi Pelajar Seksual ba SMK Kapit, apin lama ke udah.
“Pemintar bepikir beguna amat dikena nyapai penyulut nembiak sekula. Chara seseiku nembiak sekula mai diri, nagang diri ari ulah ke enda menuku, bebasaka orang tuai sereta chakah ba pengawa ko-kurikulum nyadi seiti pekara ke beguna bendar dikena nempa sida nyadi mensia ke menyana dudi hari.
“Aku pechaya nengah mayuh program ke bekaul enggau ulah nembiak baka program pengerai, pengelikun, pengelantang rama, penemu ke silik ba pelajar seksual enggau motivasi ulih meri pemanah awakka bala apai indai enggau anak sida sama beratka pemansang ruang bilik enggau penyulut ba mayuh pekara kelebih agi ba sukut pelajar sida.
Berebak enggau tu, iya ngelansa pasal pelajar seksual ukai pekara ke baru didinga ba menua tu. Urung 18,000 iku nembiak indu ba Malaysia dirikodka ngandung tumu ninting taun lalu 25 peratus ari sida tu udah belaki.
Kebuah program tu diatur ditu berindik ari peratus ke paling tinggi dirikodka nembiak indu ke tumu ngandung ba Kapit ngembuan tikas ke pemadu tinggi ba Sarawak tu lalu lumur dua ba Malaysia.
“Kitai patut ngemeratka agi penemu ba senentang tu lalu berunding baka ni ngurangka penanggul baka tu. Kitai patut nulung sida ke nembiak milih pekara ke manah ba pengidup sida iya.
“Chukup sinu lebuh ninga nembiak ke ngandung tu nyadi buah mulut mensia mayuh nyengkaum sida sebilik empu. Kitai enda nemu, nembiak indu tu engka ngembuan pengidup ke sunyi sebedau iya betubuh bisi.
“Nya alai, apai indai patut ngerapatka agi kaul begulai enggau bala anak sida dikena nagang penanggul rama baka tu.
“Apai indai patut bisi komunikasyen ke manah begulai enggau anak sida iya. Jaga mih ulah anak kita kelebih agi anak indu ari iya tepejuh jauh baka tu. Peratika mih sapa enggau iya bebakih tauka dini alai iya pengudah abis besekula, ku iya.