Servis Uber diaku perintah nengah penerang Bajet 2017

KUCHING: Sektor perengka pengangkut mensia mayuh bela diaku perintah besai lebuh sistem perengka pengangkut darat Uber mega disengkaum dalam pengawa mantaika Bajet 2017.

Menijar Besai Uber Malaysia, Leon Foong madah sistem baru tu udah diaku Menteri Besai Datuk Seri Najib Tun Razak ke nyenggala meri pangka manah ngagai status ekonomi-rama rayat Malaysia dalam segmen B40 (umur biak ari 40 taun).

“Kami berasai lantang laban perintah udah ngaku baka ni Uber ulih nyedia pilih dikena ngiga belanja nengah sekali aja tekan suis.

“Rayat Malaysia ari semua serak komuniti, kaban kunsi deriba ulih melanja pengidup diri enggau sida sebilik, kelimpah meri awak ke manah agi ngagai sida nyapai juluk,” ku iya nimbal pengawa mantaika belanja ari Najib.

Berebak enggau nya, Leon nyadaka pengaga ati laban kerita nasional, Proton setuju nyadi bakih kunsi Uber dalam bejalaika sistem pengangkut tu manah agi.

Nitih ku iya, Uber mega nyadi penengkebang pemadu beguna dalam industri mai penambang baka Proton ti nengkebang industri automotif di menua tu.

“Kami bekunsika juluk ke sama meransang Malaysia mansang ke mua nengah inovasi teknologi sereta nempa awak ekonomi.

“Nya alai, nengah inisiatif tu meransang sereta ngenegapka pengerembai ekonomi,” ku iya.

Leon madahka industri kerita penambang nya nyenggala ngayanka bala ketuai kemaya hari seruran berundingka pengigup dudi hari ungkup pengelantang rayat.

Nitih ku iya, operasyen Uber udah meri pangka ke manah ngagai rayat enggau mengeri nyungkak ekonomi kelebih agi peranak di menua tu.

Berindik ari nya, Leon madah Uber deka seruran bejalaika tanggungpengawa beguna endar dalam ngemanahka mobiliti ba mengeri di Malaysia.