Transformasi di pesisir agenda dikemerat perintah
Tu ngelai pengelurus perintah BN ke ransing mai pengelantang ngagai rayat di menua pesisir
PAKAN: Transformasi kandang menua pesisir nyadi agenda ti dikemerat perintah Barisan Nasional (BN).
Sapit Kepala Menteri, Datuk Amar Douglas Uggah Embas madah pengawa nya kelai pengelurus perintah BN ke ransing mai pengelantang ngagai rayat di menua pesisir.
Ku iya, Kepala Menteri Sarawak Datuk Patinggi Tan Sri Adenan Satem seruran ngansak bala menteri BN enggau pengari rayat ke dipilih ngambi ngemeratka pengawa sida ba pekara nyungkak tikas pengidup peranak menua pesisir ke seranta.
“Ba menua pesisir bala kitai muntang tepedaka orang ti seranta, nadai ngembuan perengka guna pemun baka jalai alun, bekal elekterik ke menyana, bekal ai beresi sereta bemacham pemansang ke bukai,” ku iya ngelansa pekara ti suah disebut Adenan ngagai sida sereta ngansak sida ngiga jalai mutarka penanggul nya nitih pematut.
Uggah mansutka pekara tu rambau ngintu Gawai Mangkung Tiang ba rumah panjai baru Rumah Sigan di Batu 16, Jalai Pakan/Engkamop semak ditu kena lemai Hari Enam tu tadi.
Iya ngasaika diri chukup betuah laban diberi basa be- jadika pengawa besai alai iya beratika pekara tu ngayanka pengelantang sida, ku iya nambah.
Iya meri pengaga ati ngagai peranak Ruamh Sigan ke udah mujur nembuka rumah panjai baru sida dalam kandang dua taun.
Meretika peranak rumah panjai nya agi begunaka be- lanja, Uggah ngemendarka geran penyampau RM1,000 ngagai genap pintu ngagai 27 pintu bilik rumah panjai nya.
Uggah ke lalu nyadi Menteri Betanam Betupi Moden enggau Ekonomi Menua Pesisir pechaya ekonomi peranak menua tu udah manah endar berindik ari rega utai tanam ke manah kelebih agi baka lada, ngujungka sida ulih ngentak rumah panjai baru.
Iya nyamin raban orang bumai alai perintah BN ba tikas perintah nengeri enggau perintah besai deka terus bejalaika program mantu komuniti orang bumi nambahka penatai pemisi ninting bulan genap ruang bilik pengabis nadai manggai RM4,000.
Kelimpah ari nya, perintah mega bejalaika mayuh bengkah skim sabsidi dikena mantu peranak menua pesisir ti gawa bumai ngambika ulih napi penyuntuk ba penatai pemisi ketegal rega asil ari kebun dandang besai baka getah, sawit enggau ke bukai.
Skim pemadu baru maya musim landas bantu RM200 sebulan ngagai orang ti ngereja getah maya musim pengujan (suah nyadi dalam bulan November, Disember enggau Januari), ku iya.
Bantu mit tu dikena ngelempungka tating penusah raban orang bukai ti enda ulih ngereja getah ketegal gaya hari, ku iya nerang lebuhka nimbal pekara bekaul ti dibantaika Tuai Rumah Sigan Jubin dalam jaku pengelalu iya dulu agi ari nya.
Dulu agi ari nya, tuai rumah panjai udah nanya nama kriteria dipinta ngambika sida ulih nerima subsidi tauka bantu ditampung mayuh bengkah ejensi baka Lembaga Minyak Sawit Malaysia (MPOB).
Ngelansa peminta Sigan ba Jalai Pakan/ Engkamop ngambika dikemanah nyadi jalai belakin ungkup pengelantang bala nembiak sekula enggau peranak ke diau ba sepemanjai jalai nya, Uggah nandu pemansang ba penyikap perengka guna pemun nyadi pemerat perintah BN ari baruh Program Transformasi Menua Pesisir (RTP).
Uggah nyamin alai iya deka ngansak belanja dikemendar tekala nya dikena ngemanahka jalai lebuh dibantai ngambi diperundingka sida.
Nitih ku Sigan, jalai tu semina naka Batu 11 aja udah dikemanah, nya alai iya ngarap ulih ditampung ari Batu 11 ngagai Sekula Primari (SK) Entabai ba Batu 19, dikemanah enggau jampat.
Tambah mega, bisi klinik ba nisi jalai, ku Sigan nampung.
Nimbal peminta nya, Kaban Kunsil Nengeri (ADUN) Meluan, Rolland Duat madah iya deka minta ngambika bela kunsi ba belanja dikena bejalaika projek infrastruktur di Meluan.
Naka ke diatu, iya ngasaika Jalai Engkamop/Pakan endang patut dikemanah laban enda dikemaru taja udah bisi kenyau ari jeman perintah koloni menya.
Iya deka suah agi bejalai ngagai sitak ngambika mending sereta meda penanggul rayat, ku iya, seraya nambah, pengudah iya menang rambau pengawa bepilih tu tadi, iya udah bejalai ngabas lebih ari 80 peratus rumah panjai di Meluan.
Sekeda bala ke bisi datai ADUN Meluan, Rolland Duat, Residen Sarikei, Dr Anthony Valentine Laiseh, Pemesai Pelilih Julau, Mohd Said Atoi, Sekretari Politik Kepala Menteri Sarawak, Thomas Romeo Christopher, Dr. Richard Rapu, Tapah Ata enggau bala ketuai komuniti ke bukai.
Ba menua pesisir bala kitai muntang tepedaka orang ti seranta, nadai ngembuan perengka guna pemun baka jalai alun, bekal elekterik ke menyana, bekal ai beresi sereta bemacham pemansang ke bukai. Datuk Amar Douglas Uggah Embas Sapit Kepala Menteri Sarawak