Presiden PBDSB: Bajet 2017 enda meratka pemaik komuniti Dayak
KUCHING: Beserimbai enggau musin kemisi sekula ujung taun tu, tentu mayuh program deka diatur piak sekula, kolej, universiti tauka seseiku orang nyengkaum aktiviti niki bukit.
Direktor Opis Pengerara Api enggau Penyah Penusah (Bomba) Nor Hisham Mohamad ngelalau mensia mayuh ke bisi ati deka niki bukit maya nya patut betatika diri empu chukup regas sereta bepengerai dikena nentuka pengawa nya nya nyadi pengawa ti merindang lalu ukai pengawa ke mai penusah.
Nor Hisham dalam jaku iya ba atur pengawa Nyerah Bot Ngesah Penusah beserimbai enggau Bulan Penyendia Tasah Nasional 2016 ulih Opis Pemansang Ekonomi Sarawak (SEDC) di Indu Opis Bomba ditu, kemari ngelalau mensia mayuh ke deka ngatur aktiviti niki bukit patut beratika tikas penegap sereta pengerai sida diri.
Iya madah beratika tu aja, ari bulan September ngagai Oktober, lima iti operasi ari sekeda ringkat (1, 2 datai ngagai 8 di Bukit Santubong), Bomba ngerikodka mujur nyelamat urung 30 iku sida ke ditinggang penusah maya niki bukit nya.
“Aku beratika penusah ke nyadi laban mensia mayuh ngumbai niki Bukit Santubong nya pengawa muntang. Reti nya, ngemuntangka utai enda betatika pengeregas diri empu lalu udah nya mejal diri niki bukit nya.
“Aku seiku orang ke rindu niki bukit, tang ba pemedis niki Bukit Santubong tu ke pengabis pedis di tiki kelebih agi lebuh niki bukit tu dalam sehari (pulai hari).
“Bisi sekeda bengkah bukit tu mar ditengah, iya nya sebengkah ari Bukit Santubong ke pedis di tiki, lalu ba penusah sentang tu ukai nya mimit tang mayuh,” ku Nor Hisham.
Nya alai, iya ngelalau mensia mayuh enda tau enda nentuka pengeregas diri sebedau niki bukit tu.
“Pengiring nya ke dua kali lipat regas sereta bepengerai, laban enti pengiring niki bukit nya enda regas, enda bepengerai, ngujungka psikologi motivasi orang ke bakal nya, nadai orang mantu.
“Ambi lalau tu nyadi tengau, laban aku irau ati meda gaya mua hari diatu ke selalu ujan, ngujungka pemar besai agi, lalu nambah enggau nya, program maya kemisi sekula dijangka mayuh,” ku iya.
Kelimpah ari nya, Opis Bomba deka seruran berandau enggau Opis Kampung bekait enggau aktiviti ke seruran digaga mensia mayuh kelebih sentang pengawa niki bukit.
“Santubong baruh pegai Opis Kampung, kami deka ngaga atur iya nya barang sapa ke niki bukit, enda tau enda ngeripot pengawa diri empu ngagai Opis Kampung, lalu nangkan nya Opis Kampung deka nyuaka ripot nya ngagai kami.
“Pengawa niki bukit tu, seiti pengawa ke ekstrim, enti kitai enda chukup regas, pengujung iya tau pulaika penusah.
“Bechuntoka kes sebedau tu, penanggul sida ke enda regas balat ngirauka ati. Pemedis baka selau, labuh sigi enda ulih diseliahka ba aktiviti niki bukit,” ku iya. KUCHING: Presiden Parti Bansa Dayak Sarawak Baru (PBDSB) Cobbold John madahka Bajet 2017 enda meratka pemaik sereta pengelantang komuniti Dayak di Sarawak.
Ku iya, pekara nya sama enggau tuduh dua iku ketuai dalam DAP ti ngasai bajet enda berundingka pemaik bansa China enggau India.
Seraya setuju enggau penemu presiden SUPP ba sentang bajet nya, Cobbold madah bajet enda mai pemaik ungkup Sarawak ketegal nadai agih belanja dikena nyendia pemansang di nengeri tu ngambi tau seikas enggau pemansang ke udah ditempa di Semenanjung Malaysia.
“Ketegal tu mih, Sarawak ke udah nyadi seiti menua ti numbuhka Federasyen Malaysia patut dipebasa, diakun ngambi diberi agih belanja ungkup pengawa pemansang ke setipak,” ku Cobbold nengah seiti surat penerang berita kemari.
Ba Bajet 2017 ke dibantai Menteri Besai kena Hari Lima tu tadi mandangka Sarawak sekali agi deka berebutka agih belanja enggau 12 nengeri bukai.
“Pekara ti dikearap komuniti Dayak ba bajet iya nya agih belanja ke adil, ti tau ngangkat pemansang di nengeri tu ngambi seikas enggau nengeri di Semenanjung Malaysia.
“Pengudah nadai agih belanja tambah ungkup pengawa pemansang di Sarawak, nadai mih pemeri ti tau mai pemaik ngagai komuniti Dayak.
“Pekara tauka pemar tu malut sida ke diau di menua pesisir ke bela napi penanggul ba pekara pelajar enggau status peranak nengeri pengudah 53 taun dalam Malaysia,” ku Cobbold.
Cobbold netap meseti bisi agih belanja ke engkeman ungkup Dayak ba pekara ubah menua pesisir, pengelandik teknikel kelebih agi ba pekara pelajar.
Iya madah pemansang ba pekara pelajar nyadi pengawa ke berat dalam atur ngemansang modal mensia.
“Pemansang bansa Dayak jemah ila bepanggai enggau pengelandik sida ba pekara teknikel lalu kitai begunaka agih belanja ba pemansang teknikel, ukai semina ngarapka semaya rambau kimpin pengawa bepilih.
“Tu mih kebuah Perintah Sarawak begulai enggau rayat Sarawak patut bejalaika atur ti patut dikena nentu kuasa otonomi nitihka MA63 dipulaika baru,” ku iya.
Berapa lama agi peranak Sarawak deka dibalut semaya ke suah agi enda dikeamat, tanya Cobbold.
Ketegal nya kuing nengeri enggau peranak Sarawak mengkang enda tampak enti otonomi enda dipulai, tandu Cobbold.