Bajet 2017 nadai nyangkung agih ngemanah Sepital Kapit

KUCHING: DAP Sibu netap Bajet 2017 nadai nyangkung agih dikena ngangkatmanah sereta ngemesai Sepital Kapit.

Ketuai DAP Katibas Paren Nyawi madah ba bulan Oktober 2013, Opis Menteri Pengerai bisi kala mansutka semaya deka ngangkatmanah ikas fasiliti Sepital Kapit nengah chara bererenggat.

“Tajapia, ba Bajet 2017 ke dibantai Menteri Besai kena Hari Lima tu tadi, nadai agih belanja disedia ungkup pengawa nya.

“Semina Sepital Kuching enggau Mukah aja ke bisi diberi belanja ungkup pengawa ke sama,” ku iya nengah seiti surat penerang berita kemari.

Paren ke mega Pemantu ‘ Khas’ MP Sibu madah opis menteri kala ngangkatmanah Unit Kecema- san ba 2010, Unit ‘ ICU’ enggau stor ubat ba 2011 kelimpah wad ‘ paediatric isolation’ ba 2012.

Ku iya nambah, Sepital Kapit nerima penemuai raban pakar nitihka maya ke ditetap kelebih agi ba maya pengawa bebuntas, otorinolaringologi, oftalmologi, ortopedik enggau psikiatri.

“Opis menteri patut berundingka perambu nyendia mayuh agi raban pakar ba pekara pengerai, pakar buntas enggau pakar sakit tulang di Sepital Kapit.

“Tu ketegal, orang sakit suah dipindah ngagai Sepital Sibu pengudah nadai pakar buntas tajapan Sepital Kapit ngembuan palan bebuntas.

“Pejalai ari Kapit ke Sibu begunaka timpuh 3 jam ngena bot lalu urung 4 tauka 5 jam datai ba Sepital Sibu,” ku iya seraya ngarap perintah meratika enggau berat pekara tu.

Nitihka penerang ari Spital Kapit ku Paren, urung dua iti kes sehari orang sakit dianjung ari Sepital Kapit ke Sepital Sibu, iya nya urung 60 nyentuk ngagai 70 kes dalam timpuh sebulan.

Tebal agi orang sakit enggai dipindah ngagai Sepital Sibu ketegal ti kelalu jauh kelimpah penanggul ba pekara belanja.

“Orang sakit ke kurang pemisi enggai dipindah ke Sepital Sibu lalu bisi 300 iti rumah panjai ngelingi Pelilih Song enggau Kapit,” ku Paren.

Nitihak penerang ari Paren, maya ke diatu Sepital Kapit disikap enggau 135 iti katil.