Rayat gagit enggau agenda pemansang dibai perintah
Peranak Engkilili beterima kasih ke agenda pemansang nya ke deka dikemujur perintah di menua sida
ENGKILILI: Perintah Barisan Nasional (BN) endang naka ulih ngemansangka Sarawak lalu tu meri pengagit ngagai peranak Engkilili ke beterima kasih ngagai agenda pemansang nya kelebih agi ungkup sida di menua pesisir.
Nitih ku Kaban Kunsil Nengeri (ADUN) Engkilili Dr Johnical Rayong Ngipa, komuniti menua pesisir melaba mayuh agi pemansang ungkup sida berindik ari sukung nadai bebagi ngagai perintah lalu tu udah nyengala dipeda rambau Pengawa Bepilih Nengeri (PRN) apin lama ke udah.
“Aku pechaya perintah BN enda nejuka peminta kitai di menua pesisir lalu sigi naka ulih mai mayuh pemansang nitihka peminta ba sesebengkah menua ngambika takah pemansang di mengeri enggau menua pesisir ulih dikedut.
“Endang udah nyadi pekara dikemerat bala ketuai tinggi BN ti betuaika Kepala Menteri Datuk Patinggi Tan Sri Adenan Satem enggau rintai kabinet iya sereta pengari- pengari rayat BN pan bebendar gawa mantu rayat ba sitak dipegai sida empu,” ku iya lebuh bejaku ba Pengerami Pemesai Begulai Enggau Rayat ba Rumah Tayan, Nibong, ditu, apin lama ke udah.
Nampung jaku iya, Dr Rayong minta bala rayat kelebih agi peranak menua pesisir patut regas ngerebut awak ke bisi disedia perintah nengah ejensi iya kelebih agi dalam pengawa betanam betupi komersial.
“Diatu, perintah meransang bala rayat kelebih agi sida ke ngempu tanah ngena awak dalam pengawa betanam betupi laban ulih mansutka penatai pemisi ke menyana nyema dikereja enggau pengeransing, patut dikeingat kitai patut berunding panjai sereta enda ngumbai pengawa betanam betupi tu kelas kedua tang ngaku iya sebengkah pengawa dagang,” ku iya.
“Nama guna kitai bisi tanah bepuluh-puluh tauka mang- gai beratus ekar pemesai tang ditejuka repa pia aja,” ku iya nanya seraya nampung, minta sida ke ngempu tanah bechunto bansa bukai ke nyulut dalam pengawa betanam betupi ba tanah enda besai tang ulih mansutka asil manggai bepuluh ribu ringgit sebulan.
Ku iya nambah, rayat patut ngena awak pemansang besemak enggau sida bala jalai alun enggau bekal elekterik 24 ba pengawa betanam betupi enggau agro-betanam betupi.
“Udah nyadi juluk perintah deka meda rayat di menua pesisir ngembuan penatai pemisi lebih ari RM4,000 sebulan datai ba taun 2020, laban tu ulih mansutka kitai ari pekuh penyeranta, nya alai perintah naka ulih nyediaka mayuh macham belanja enggau skim latih dikena nentuka juluk perintah tu ulih dijapai,” ku iya.
Berebak enggau nya, Dr Rayong mega bisi ngemendar geran Projek Mit Pemansang Menua Pesisir (MRP) ngagai Komiti Pemansang Enggau Pengelikun Genturung Pendiau (JKKK) Rumah Tayan penyampau RM7,000 dikena sida ngatur aktiviti.
Sama bisi datai Penghulu Gerang Anchih, Penghulu Inchang Anchih, Mandal Chairman Parti Rakyat Bersatu (UPP) Engkilili Peter Jawi, bala kaunsilor, bala tuai rumah sereta komuniti ke besemak.
Aku pechaya perintah BN enda nejuka peminta kitai di menua pesisir lalu sigi naka ulih mai mayuh pemansang nitihka peminta ba sesebengkah menua ngambika takah pemansang di mengeri enggau menua pesisir ulih dikedut. Dr Johnical Rayong Ngipa ADUN Engkilili