Nembiak sekula ke kurang nyulut diperansang ngambi bidang teknikal
KAPIT: Bala nembiak sekula kelebih agi ke kurang nyulut diperansang milih bidang teknikal enggau vokasional laban bidang tu mega ulih meri pemaik ngagai sida jemah.
Residen Pelilih Kapit, Joseph Belayong madahka jaku tu lebuh ke bejadika Program Kesedaran enggau Advokasi Penemu Seksual ba SMK Kapit apin lama ke udah.
“Sida ke udah lepas SPM sereta bisi ati belajar ba bidang teknikal enggau vokasional endang diperansang nyambung pelajar ngagai palan ke lebih tinggi ngambika tau bulih pengawa ke menyana nengah pengelandik ke dikembuan. Ukai semina nya aja, sida mega deka diberi Sijil Kemahiran Malaysia,” ku iya.
Berebak enggau nya, iya ngelalau bala apai indai patut meri sukung ngagai bala anak sida nitihka nama utai ke dikerindu anak.
Pia mega sida patut nemu genap peluang ke bisi disediaka perintah ba pekara pelajar.
“Aku mega meransang bala nembiak ke bisi ngambi kus ba palan pelajar tinggi perintah tauka peribit patut ngemeranka latih bekaul enggau SCORE enggau HUB HALAL Tanjung Manis baka industry aluminium, petro kimia, betanam betupi, kacha, berikan, servis, ICT enggau industri teknologi tinggi,” ku iya.
Kelimpah ari nya, iya bisi ngelansa pasal Sarawak ngembuan rikod lumur dua ba Malaysia pemadu mayuh nembiak indu ngandung biak umur nangkan Sabah.
“Nitihka statistik ke diambi ari OSTPC (One Stop Teenage Pregnancy Committee), Sarawak ngerikod ba penuduk lumur dua pemadu mayuh nembiak indu ngandung biak nangkan Sabah di Malaysia tu.
“Ba Sarawak aja, Pelilih Kapit ngembuan tikas ke pemadu tinggi kenyau ari taun 2011 sepenyampau 15 peratus.
“40 peratus sida tu ngandung empai belaki lalu lima peratus agi sida tu ngandung biak ari 16 taun lalu ngerikod nembiak ke pemadu biak ngandung ba Kapit iya nya beumur 11 taun ba Belaga,” ku iya.
Joseph ngelalau apai indai patut bisi komunikasyen ke manah enggau bala anak kelebih agi anak indu sida. Iya ngarapka 10 peratus ari penyampau nya ulih dikurang berengkah taun 2016 tu.
Sama bisi datai, Prinsipal SMK Kapit, Azlinda Mohd Nor, Chairman PIBG Smk Kapit, Ambrose Abong, Dr Zufar Yadi Brendan Abdullah, Sekretari Eksekutif Kaunsil Pemansang Rama ngarika sekretari mendam ba Opis Pegelantang Pendiau, Orang Indu enggau Pengelantang Komuniti, ketuai opis perintah, ketuai komuniti, tuai rumah, nembiak sekula, pengajar enggau apai indai nembiak.