Konsert Gospel Antarabansa Mengeri Miri diatur 28-29 Oktober

MIRI: Opis Kunsil Mengeri Besai Miri (MCC) enggau Gerija Sidang Injil Borneo (BEM) ditu keterubah iya deka bekerejasama ngatur Konsert Gospel Antarabansa Mengeri Miri 2016.

Tuju atur konsert tu deka meransang pengawa pengelantang enggau pengelikun, sereta mega meri penyedar pemesai guna idup bebaik sereta ngangkatka pemanah mengeri besai Miri.

Chairman Pengatur Pastor Andy Anyi madah konsert nya deka diatur berengkah ari 28 ngagai 29 Okt tu ba Eastwood Valley Golf and Country Club, urung pukul 7.30 lemai.

“Sekeda tuju ke bukai konsert tu deka mantaika penau raban nembiak ari Miri, Kuching enggau Sabah, nengah lagu gospel, tanda moden, ‘beatboxing’ enggau tanda hiphop, sereta begulai enggau sida ke ngembuan penau ari luar menua Malaysia.

“Kami meda bisi ngangauka bala artis gospel ari Indonesia baka Andy Fenly Jandri (finalis Indonesia Idol) enggau Nova Putri Marinda (penanyi gospel). Bala sida tu deka merindang dua malam berunggu,” ku iya.

Raban ari menua tu deka merindang ba konsert malam nya baka Ladies of Hornbill, Isaiah, Rock Nation, PYC Group, Motion Family, SC Group, Adorable Crew. Bisi mega pemerindang solo ari Tingang Madang.

Nitih ku Anyi, Kaban Kunsil Nengeri (ADUN) Telang Usan Dennis Ngau dipelaba deka datai bejadika konsert nya kena 28 Oktober urung pukul 7.30 lemai.

“Kami melabaka urung 5,000 iku deka datai beperindang meda konsert tu, alai kami udah nesau raban mensia mayuh ngagai Kuching, Bintulu, Bario, Limbang, Lawas, Sabah sereta mega menua Brunei enggau Indonesia,” ku iya.

Mensia mayuh nadai ngira tikas umur bela diperansang datai sereta beperindang rambau konsert tu laban tama nadai bebayar.