PBK nyukung pengeransing KM ngambi pulai hak Sarawak

SIBU: Parti Bumi Kenyalang ( PBK) lantang ati sereta nyukung bendar pengeransing Kepala Menteri Datuk Tan Sri Adenan Satem deka ngambi pulai hak menua Sarawak.

Nengah penerang media ke diterima kemari, PBK madah, sida besetujuka ke jaku dibantai Adenan ti madahka pengawa ti ngubah status Sabah enggau Sarawak ngagai tikas nengeri dalam Malaysia nya enda ‘sah’.

“Penerang ke digaga ba Perlembagaan Persekutuan Malaysia 1976 meseti dikinsil lalu pulaika baru hak Sabah enggau Sarawak baka Semenanjung Tanah Melayu.

“Kebuah pia laban ubah ba Perlembagaan Persekutuan Malaysia 1976 besibil enggau Sempekat Malaysia 1963,” pia ku penerang nya.

PBK madah, ubah nya enda nitihka undang-undang laban ti enda ulih diubah baru sepengudah Sempekat Malaysia 1963 digaga ti betikas antarabansa ke bela disain di London sereta direjister di United Kingdom ba United Nation ( Pertubuhan Bangsa- Bangsa Bersatu).

Tu mandangka sempekat nya ukai semina digaga kaban Parlimen Perintah Besai Malaysia aja ulih diubah tauka diganti.

“Semua kitai patut nemu, ubah tu semina ulih digaga nitihka aum lima bengkah komponen iya nya United Kingdom, Singapura, Semenanjung Tanah Melayu, Sabah enggau Sarawak.

“Kaban Parlimen Perintah Besai Malaysia enda ngarika hak menua Sabah enggau Sarawak laban nya enda ulih ditukuka,” ku iya madah.

Penerang tu mega madah, Sempekat Malaysia meri mayuh bengkah kuasa ngagai Sabah enggau Sarawak tang sempekat nya udah nyadi pekara ti dipelalaika nengah ‘Undang-undang Rahsia’.

Nya alai, semina mimit aja orang nemu pekara nya lalu ngujungka mensia mayuh salah peragam kelimpah bela digerini orang ti bisi ngembuan tuju kediri.

Bepun ari nya, Perintah Besai Malaysia nyau ngaga ubah tang nadai minta pemendar tauka dipadah ngagai perintah menua Sabah enggau Sarawak baka hak ngambi minyak, gis enggau petroleum ba dua bengkah menua tu.

Pekara tu nejuka Sabah enggau Sarawak balat rugi ba pengelama lebih 50 taun nyengkaum ba pekara pemansang infrastruktur.

Ngelansa ubah ke digaga suba, PBK madah, ubah ke digaga ba Perlembagaan Persekutuan Malaysia 1976 disukung bala raban Barisan Nasional/ UMNO, USNO, Persatuan Chinese Sabah di Sabah lalu di Sarawak disukung PBB, SNAP enggau SUPP.

“Nya alai, semua parti tu patut nemu nama ke meseti digaga diatu ketegal ti udah nyukung pengawa nya suba.

“Enggau tu, PBK ngarap sereta andal semua parti tu ulih besaup sereta ransing ba pengawa ngambi pulai baru tikas hak ngambika sebaka enggau Semenanjung Tanah Melayu,” ku iya nambah.

PBK mega besetuju enggau pengawa Pakatan Rayat ti deka mantaika perambu ba Kunsil Nengeri Sarawak (DUN) ngambika semua Kaban DUN Sarawak bela ulih mantaika penemu lalu besaup ngambi baru hak menua tu.

Nambahka nya, Sapit Chairman Pakatan Rakyat See Chee How bela minta semua bala ADUN nyengkaum numbuhka seiti komiti ti betuaika Adenan ngemujurka juluk ati nya.

“PBK bela lantang ati laban Parti Tindakan Demokratik (DAP) enggau PEKEMAS bela besetuju ngenggaika ubah nya.

“Pengawa sida tu mandangka diri chakah ngetanka pengamat enggau randaka pengawa ti enda bechiping nundaka sejarah ke bendar,” ku iya madah.